ഒരു ദിവസം ആരും ഇല്ലാത്ത സമയത്ത് അവൾ ജോർജിനോട് പറഞ്ഞു, “സാർ, ഇന്ന് വൈകുന്നേരം ഒന്ന് ഫ്രീ ആണോ? ആരും അറിയാതെ എന്റെ വീട്ടിലേക്ക് ഒന്ന് വരാമോ……

Story written by JK

“ഈ പുതിയ ഷർട്ട് സാറിന് നന്നായി ചേരുന്നുണ്ട് കേട്ടോ! പക്ഷേ ഇതിന് ബ്ലാക്ക് കളർ പാൻസ് ആയിരിക്കും ഒന്നുകൂടി നന്നാവുക!”
​ഓഫീസിൽ പുതുതായി വന്ന ലീന അങ്ങനെയൊരു കോംപ്ലിമെന്റ് കൊടുത്തപ്പോൾ ജോർജിന് ഒത്തിരി സന്തോഷം തോന്നി. ഇത് കഴിഞ്ഞദിവസം വാങ്ങിയ പുതിയ ഷർട്ട് ആണ്. രാവിലെ ഇതും ഇട്ടുകൊണ്ട് തന്റെ സ്വന്തം ഭാര്യയായ സെലീനയുടെ മുന്നിൽ പോയി നിന്നു. അവൾ ഒന്ന് ശ്രദ്ധിച്ചത് കൂടിയില്ല. “കടുക് തീർന്നുപോയി, വരുമ്പോൾ ഒരു പാക്കറ്റ് വാങ്ങണേ” എന്ന് പറഞ്ഞ് അടുക്കളയിലേക്ക് ഓടുകയായിരുന്നു അവൾ.

​അല്ലെങ്കിലും തന്റെ സങ്കൽപ്പത്തിന് ഒത്ത ഒരു ഭാര്യ ഒന്നുമല്ല അവൾ. ഏതു നേരവും വീട്ടുജോലി എന്ന ഒരു മന്ത്രം മാത്രമേ അവൾക്ക് ഉള്ളൂ. ബാക്കി ഉള്ള കാര്യത്തിൽ ഒന്നും അവൾ ശ്രദ്ധിക്കില്ല. എന്തിന് തന്റെ കൂടെ പുറത്തേക്ക് ഇറങ്ങുമ്പോൾ ഒന്ന് മര്യാദയ്ക്ക് ഒരുങ്ങാൻ പോലും അവൾക്ക് പറ്റില്ല. ഏതെങ്കിലും ഒരു ചുരിദാറോ സാരിയോ എടുത്തിട്ട് തന്റെ കൂടെ വരും..

​ഇതൊന്നും ജോർജ് അത്രയ്ക്ക് ശ്രദ്ധിച്ചിരുന്ന കാര്യമല്ല. പക്ഷേ ഇപ്പോൾ ശ്രദ്ധിക്കാൻ തുടങ്ങിയതിന് പിന്നിൽ മറ്റൊരു കാരണം ഉണ്ടായിരുന്നു; അയാളുടെ ഓഫീസിലേക്ക് പുതുതായി വന്ന ലീന. ഒരുങ്ങി ഭംഗിയിൽ നടക്കുന്ന ലീനയെ കാണുന്നത് തന്നെ ഒരു ഐശ്വര്യമാണ്. ഓഫീസിലുള്ള എല്ലാവരുടെയും ആരാധനാ കഥാപാത്രം ആണ് ലീന.
അവളെ കാണുമ്പോൾ എല്ലാം തന്റെ ഭാര്യയും ഇവളെ പോലെ ആയിരുന്നെങ്കിൽ എന്ന് അയാൾ ആലോചിക്കാറുണ്ട്..

ലീന എല്ലാവരോടും ചിരിച്ച് സംസാരിക്കും വളരെ ഒരു പോസിറ്റീവ് എനർജിയാണ് അവരെ കാണുമ്പോൾ.. എന്നാൽ തന്റെ ഭാര്യയുടെ നാവിൽ വരുന്നത് വീട്ടിലെ ആവശ്യത്തിനുള്ള സാധനങ്ങളുടെ ലിസ്റ്റും, മറ്റെന്തെങ്കിലും കുടുംബപരമായ കാര്യങ്ങളും ആയിരിക്കും..

ലീനയെ പോലെ തമാശ പറയാനോ ഒരാളുടെ മൂഡ് ഒന്ന് ഒക്കെ ആക്കി എടുക്കാനോ ഒന്നും അവൾക്ക് അറിയില്ല… ഓരോ ദിവസം ചെല്ലുംതോറും തന്റെ ഭാര്യയെ ലീനയുമായി അയാൾ കൂടുതലായി കമ്പയർ ചെയ്യാൻ തുടങ്ങി..

ലീന കൂടെയുള്ളപ്പോൾ വല്ലാത്ത ഒരു എനർജി അയാൾക്ക് ഫീൽ ചെയ്യാൻ തുടങ്ങി അതുകൊണ്ട് തന്നെ ലീനയോട് കൂടുതൽ നേരം ഉണ്ടാക്കി ജോർജ് സംസാരിച്ചു… ​ഓഫീസിൽ വെച്ച് ലീനയും ജോർജിനോട് കൂടുതൽ അടുക്കാൻ തുടങ്ങി. “ജോർജ് സാർ കാണാൻ നല്ല ഹാൻഡ്‌സം ആണ്,” എന്ന് ലീന ഒരിക്കൽ പറഞ്ഞപ്പോൾ ജോർജിന് വല്ലാത്ത ഒരു സന്തോഷം തോന്നി..

ഒരിക്കൽ ഓഫീസിൽ ഉണ്ടായ ഒരു ഫങ്ഷനിൽ ജോർജ് എല്ലാവരുടെയും നിർബന്ധപ്രകാരം ഒരു പാട്ടു പാടിയപ്പോൾ, ലീന ഒരുപാട് ജോർജിനെ അഭിനന്ദിച്ചു..

ആ സമയം അയാൾ ഓർത്തത് ഫാമിലിയിലെ ഒരു ഫംഗ്ഷനിൽ താൻ പാട്ടു പാടിയപ്പോൾ, കുടിച്ച് ബോധമില്ലാതെ ചെയ്യുകയാണ് എന്നും പറഞ്ഞ് തന്നെ കുറ്റപ്പെടുത്തിയ സലീനയുടെ മുഖമായിരുന്നു… ലീന തന്റെ എല്ലാ ചെറിയ കാര്യങ്ങൾ പോലും ശ്രദ്ധിക്കുന്നുണ്ട് എന്നത് അയാൾക്ക് അത്ഭുതം ആയി തോന്നി..

പതിയെ ജോർജിന് അവളോട് ഒരു പ്രത്യേക താല്പര്യം തോന്നി.
അവളും ഇപ്പോൾ ജോർജിന്റെ അടുത്ത് കൂടുതൽ അടുപ്പത്തിൽ പെരുമാറുന്നുണ്ട് ഇടയ്ക്ക് ഒരു തട്ടലും മുട്ടലും ഒക്കെ…

ജോർജിന് അതെല്ലാം വലിയ അത്ഭുതങ്ങൾ ആയിരുന്നു.. അവൾ അറിയാതെയാണ് ഇതെല്ലാം ചെയ്യുന്നത് എന്ന് അയാൾ കരുതി..

അവൾ അടുത്തേക്ക് വരുമ്പോൾ ഉള്ള ലേഡീസ് പെർഫ്യൂമിന്റെ മണവും ചിരിയോടെയുള്ള അവളുടെ സംസാരവും എല്ലാം ജോർജിന്റെ ഉള്ളിൽ നിറഞ്ഞു..

ലീനയുടെ വിവാഹം കഴിഞ്ഞതാണ് അവളുടെ ഭർത്താവ് ലണ്ടനിലോ മറ്റോ ആണ് എന്നാണ് അവൾ പറഞ്ഞത് ജോർജ് ചിന്തിച്ചത് മുഴുവൻ അയാളെ കുറിച്ചായിരുന്നു.. എന്റെ ഭാഗ്യവാനാണ് അയാൾ ഇത്രയും സുന്ദരിയായ ഒരു ഭാര്യയെ കിട്ടി…

ലീന അധിക ദിവസവും ബ്യൂട്ടിപാർലറിൽ പോകും എന്ന് പറഞ്ഞു.. നമ്മുടെ സൗന്ദര്യം ദൈവം കനിഞ്ഞു തന്നതാണ് അത് നമ്മൾ സംരക്ഷിച്ചുകൊണ്ട് നടക്കണം എന്നെല്ലാം അവൾ പറഞ്ഞപ്പോൾ അതെല്ലാം ശരിയാണ് എന്ന് ജോർജിന് തോന്നി.

ഈ സമയത്ത് വെറുതെ തന്റെ ഭാര്യയെ അയാൾ ഒന്ന് ഓർത്തു.. മുഖത്ത് പുരട്ടാൻ ഒരു ക്രീം പോയിട്ട് ഇത്തിരി വിലയുള്ള ഒരു സോപ്പ് പോലും അവൾ വാങ്ങില്ല. മാവേലി സ്റ്റോറിൽ നിന്ന് കിട്ടുന്ന മൂന്നെണ്ണം വാങ്ങുമ്പോൾ ഒന്ന് ഫ്രീയുള്ള സോപ്പാണ് അവൾ എല്ലാം വാങ്ങി കൊണ്ടു വരുന്നത്.. അവിടെ പോലും ലാഭം നോക്കുന്നവൾ.

ലീനയോട് ഒരുതരം ബഹുമാനം കലർന്ന ഇഷ്ടമായിരുന്നു ജോർജിന്.. പെണ്ണുങ്ങളായാൽ ഇങ്ങനെ വേണം എന്നൊരു അഭിപ്രായം അയാളുടെ ഉള്ളിൽ നിറഞ്ഞു.

ലീനയും അയാളോട് ഇപ്പോൾ കൂടുതൽ അടുപ്പത്തോടെ പെരുമാറാൻ തുടങ്ങി.. അവൾക്ക് മറ്റുള്ളവർ കാണും എന്നൊന്നും ഉണ്ടായിരുന്നില്ല എന്നാൽ അവൾ തന്റെ അരികിൽ വന്ന് ഇരിക്കുമ്പോൾ മറ്റുള്ളവർ അസൂയയോടെ നോക്കുന്നത് ജോർജ് കാണുന്നുണ്ടായിരുന്നു അയാൾക്ക് അതങ്ങ് സുഖിച്ചു

ഒരു ദിവസം ആരും ഇല്ലാത്ത സമയത്ത് അവൾ ജോർജിനോട് പറഞ്ഞു, “സാർ, ഇന്ന് വൈകുന്നേരം ഒന്ന് ഫ്രീ ആണോ? ആരും അറിയാതെ എന്റെ വീട്ടിലേക്ക് ഒന്ന് വരാമോ? എനിക്ക് സാറിനോട് കുറച്ചു കാര്യങ്ങൾ സംസാരിക്കാനുണ്ട്.” ആ ക്ഷണം കേട്ടപ്പോൾ ജോർജ് ആകെ ഷോക്ക് ആയി എന്താണ് ലീനയുടെ ഉദ്ദേശം എന്ന് അറിയില്ല.. എന്തായാലും തന്നോട് സംസാരിക്കണം എന്നുണ്ടെങ്കിൽ വീട്ടിലേക്ക് വരാൻ പറയേണ്ടല്ലോ?? അങ്ങനെ അവൾ പറയണമെന്നുണ്ടെങ്കിൽ തനിക്ക് അവളോട് ഒരു താൽപര്യമുണ്ട് എന്ന് അവൾ മനസ്സിലാക്കിയിരിക്കും..

ജോർജിന് എന്തോ ഒരു കുറ്റബോധം ഉള്ളിൽ തട്ടി. ജോർജ് ചിന്തിച്ചു, “സെലീന എന്നെ ഒരുപാട് സ്നേഹിക്കുന്നുണ്ട്. അവൾക്ക് ഞാനും കുഞ്ഞുങ്ങളും അല്ലാതെ മറ്റൊരു ലോകം ഇല്ല. വീട്ടിലെ ജോലികൾ ക്കിടയിൽ അവൾ സ്വന്തം കാര്യം മറന്നു പോകുന്നത് ഞങ്ങൾക്കും വേണ്ടിയല്ലേ?” അതു കൊണ്ടു തന്നെ അവളെ ചതിക്കാൻ ജോർജിന് മനസ്സ് വന്നില്ല. “ലീന, എനിക്ക് ഇന്ന് കുറച്ചു തിരക്കുണ്ട്, വരാൻ പറ്റില്ല” എന്ന് പറഞ്ഞ് അയാൾ അവിടെ നിന്നും ഒഴിഞ്ഞു മാറി. ​എന്നാൽ അവരുടെ ഓഫീസിലുണ്ടായിരുന്ന ആദർശ് എന്ന ചെറുപ്പക്കാരൻ ലീനയുടെ വലയിൽ വീണു. ശരിക്കും ഒരു ഹണി ട്രാപ്പ് ആയിരുന്നു ലീനയുടെ ലക്ഷ്യം. കല്യാണം കഴിഞ്ഞവരെയും മാന്യന്മാരെയും പ്രലോഭിപ്പിച്ച് വീട്ടിൽ വിളിച്ചു വരുത്തി അവരുടെ സ്വകാര്യ നിമിഷങ്ങൾ രഹസ്യമായി വീഡിയോയിൽ പകർത്തി പണം തട്ടുകയായിരുന്നു അവളുടെ രീതി.

ദിവസങ്ങൾ കഴിഞ്ഞപ്പോൾ ആദർശ് ആകെ തളർന്നു പോയി. ലീന അയാളെ ഭീഷണിപ്പെടുത്തി വലിയൊരു തുക ആവശ്യപ്പെട്ടു. “പണം തന്നില്ലെങ്കിൽ ഈ വീഡിയോ നിന്റെ ഭാര്യക്കും വീട്ടുകാർക്കും അയച്ചു കൊടുക്കും” എന്ന് അവൾ പറഞ്ഞു. ഒടുവിൽ സഹികെട്ട ആദർശ് പോലീസിൽ പരാതി നൽകി. പോലീസ് നടത്തിയ റെയ്ഡിൽ ലീനയെയും അവളുടെ കൂടെയുള്ള ഗു,ണ്ടകളെയും പിടികൂടി.
​അപ്പോഴാണ് ജോർജ് ഞെട്ടിക്കുന്ന സത്യം അറിഞ്ഞത്. തന്റെ ഓഫീസിലെയും പരിസരത്തെയും മാന്യന്മാരായ പലരും അവളുടെ വലയിൽ വീണിരുന്നു. ആ വലിയ അപകടത്തിൽ നിന്നും തലനാരിഴയ്ക്കാണ് താൻ രക്ഷപ്പെട്ടതെന്ന് ജോർജ് തിരിച്ചറിഞ്ഞു. അയാൾക്ക് സെലീനയോടുള്ള സ്നേഹം ഇരട്ടിച്ചു. ​അയാൾ വേഗം തന്നെ വീട്ടിലെത്തി സെലീനയെ ഒന്ന് ചേർത്ത് പിടിച്ചു.

“നിങ്ങൾ എന്തിനാ ഇച്ചായ ആദ്യമായി കാണുന്നതുപോലെ ഇങ്ങനെ നോക്കുന്നത്?” എന്ന് അത്ഭുതത്തോടെ ചോദിച്ച അവളോട് അയാൾ പറഞ്ഞു, “ഒന്നുമില്ലെടാ, നീ ഈ വീടിന്റെ ഐശ്വര്യമാണ്.” എന്ന്
​അന്ന് മുതൽ ജോർജ് വീട്ടിലെ ജോലികളിൽ അവളെ സഹായിക്കാൻ തുടങ്ങി. അവൾക്ക് വേണ്ടി ഡ്രസ്സുകൾ വാങ്ങി നൽകി. ജോർജിന്റെ സ്നേഹവും കരുതലും കണ്ടപ്പോൾ സെലീനയിലും മാറ്റങ്ങൾ വന്നു. അവൾ ജോർജിന് ഇഷ്ടപ്പെട്ട രീതിയിൽ സാരി ഉടുക്കാനും മുടി കെട്ടാനും സമയം കണ്ടെത്തി. പുറത്ത് കാണുന്ന തിളക്കത്തേക്കാൾ വലുത് വീടിനുള്ളിലെ ആത്മാർത്ഥമായ സ്നേഹമാണെന്ന് ജോർജ് മനസ്സിലാക്കി.
​