എന്തേലും പ്രോബ്ളമുണ്ടോ? കയറിയപ്പോൾ മുതൽ ഞാൻ ശ്രദ്ധിക്കുന്നു , ആകെ ഗ്ളൂമിയായിരിക്കുന്നു ? അല്ല പറയാൻ ബുദ്ധിമുട്ടുണ്ടെങ്കിൽ വേണ്ട , വ്യക്തിപരമായ കാര്യങ്ങൾ……

എഴുത്ത്:-തൈപ്പറമ്പൻ

ഇന്ന് ഞാൻ ട്രെയിനിൽ ആലപ്പുഴയ്ക്ക് വരുമ്പോൾ ,എൻ്റെ എതിർവശത്തിരുന്നത് ഏകദേശം 27 വയസ്സ് പ്രായമുള്ള ഒരു യുവതിയും, അഞ്ചോ ആറോ വയസ്സ് തോന്നിക്കുന്ന ഒരു പെൺകുട്ടിയുമായിരുന്നു

അവരുടെ വേഷവും ,ബോഡി ലാംഗ്വേജും പിന്നെ മകളുമായുള്ള കമ്യൂണിക്കേഷനിൽ നിന്നുമൊക്കെ ആ യുവതി നല്ല പഠിപ്പും സമ്പത്തുമുള്ള ഹയർ ഫാമിലിയിൽ പെട്ടതാണെന്ന് എനിക്ക് മനസ്സിലായി

മാത്രമല്ല ആ ചെറിയ കുട്ടി നല്ല സ്മാർട്ടായിരുന്നു, അവളുടെ ഒഴുക്കോടെയും ചുറുചുറുക്കോടെയുമുള്ള ഇംഗ്ളീഷിലുള്ള സംസാരമായിരുന്നു, ഞാനാ കുട്ടിയെ ശ്രദ്ധിക്കാനുള്ള പ്രധാന കാരണം.

ഇടയ്ക്ക് ഷൊർണ്ണൂര് വണ്ടി നിർത്തിയപ്പോൾ എന്തേലും സ്‌നാക്‌സ് വാങ്ങാമെന്ന് കരുതി ഞാൻ പുറത്തിറങ്ങി, ആദ്യം ഒരു പായ്ക്കറ്റ് ലെയ്സാണ് വാങ്ങിയത് ,അപ്പോഴാണ് ആ കുട്ടിയുടെ കാര്യം ഓർത്തത് , പിന്നെ ഞാൻ ഒരു കുർകുറെ കൂടി വാങ്ങി ,

അകത്ത് ചെന്ന് കുർകുറെ ആ കുട്ടിക്ക് നീട്ടിയപ്പോൾ അവൾ അമ്മയെ നോക്കി,
അമ്മ ,എന്നെ നോക്കിയിട്ട് No thanks എന്ന് പറഞ്ഞപ്പോൾ ഞാനാകെ ചമ്മിപോയി

പിന്നെ കുർകുറെ എൻ്റെ ബാഗിൽ വച്ചിട്ട് ഞാനെൻ്റെ ലെയ്സ് പെട്ടിച്ച് കൊറിക്കാൻ തുടങ്ങി, അപ്പോഴും ആ കുട്ടി കൈയ്യിലുള്ള സ്ളേറ്റിൽ എന്തൊക്കെയോ എഴുതുകയും വരക്കുകയും ചെയ്യുന്നുണ്ടായിരുന്നു
ഞാനത് കൗതുകപൂർവ്വം വീക്ഷിച്ച് കൊണ്ടിരുന്നപ്പോൾ, അമ്മക്കിളി എന്നെ പാളി നോക്കുന്നത് കണ്ട് ഞാനൊന്ന് പുഞ്ചിരിച്ചു.

പെട്ടന്നവൾ മുഖം തിരിച്ച് പഴയത് പോലെ ഗൗരവത്തിലിരുന്നു.

ഇതിനിടയ്ക്ക് ടിടിഇ വന്നു ടിക്കറ്റ് ചെക്ക് ചെയ്തപ്പോഴാണ് മനസ്സിലായത് അവരുടെ ടിക്കറ്റ് കൺഫോമായിട്ടില്ലായിരുന്നെന്ന് , ടിടിഇയോട് എങ്ങനെയെങ്കിലും ഒരു സീറ്റ് കൺഫോമാക്കി കൊടുക്കണമെന്നും തിരുവനന്തപുരം വരെ യാത്ര ചെയ്യാനുള്ളതാണെന്നും ആ യുവതി പറഞ്ഞപ്പോൾ സീറ്റുകൾ ഒന്നും ഒഴിവില്ലെന്നും തത്കാലം Non A C കോച്ചിൽ ഒരുസീറ്റ് റെഡിയാക്കി തരാമെന്നും അടുത്ത സ്‌റ്റോപ്പ് എത്തുമ്പോൾ ഇറങ്ങിയിട്ട് മാറി കയറിയാൽ മതിയെന്നും TTE മറുപടി പറഞ്ഞു

അത് കേട്ട് യുവതിയുടെ മുഖം വാടി.

കുട്ടിക്ക് നല്ല സുഖമില്ലെന്നും ഇപ്പോഴത്തെ ചൂട് അവൾക്ക് താങ്ങാനാവില്ലെന്നും ബോഡി ഹീറ്റാകുമ്പോൾ അവൾക്ക് ഫിറ്റ്സ് വരാൻ സാധ്യതയുണ്ടെന്നും മുൻ അനുഭവം വച്ച് ആ യുവതി TTE യോട് സംസാരിച്ചെങ്കിലും അവർ നിസ്സഹായതയോടെ കൈമലർത്തുകയായിരുന്നു

ഹലോ മേഡം, കൂട്ടുകാരന് വേണ്ടി ,
ആ വിൻഡോ സീറ്റും ഞാൻ ബുക്ക് ചെയ്തതായിരുന്നു,അവന് സമയത്ത് എത്താൻ കഴിഞ്ഞില്ല , ആലപ്പുഴ വരെ അവരവിടെ ഇരുന്നോട്ടെ ,അത് കഴിയുമ്പോൾ കോച്ച് മാറി കയറിയാൽ മതിയല്ലോ?

ഞാൻ പെട്ടെന്ന് TTE യോട് ചാടിക്കയറി പറഞ്ഞു

ആങ്ഹ് എന്നാൽ പിന്നെ അങ്ങോട്ടിരുന്നോളു ആലപ്പുഴയിലെത്തുമ്പോൾ അവിടുന്ന്
പിന്നെ സീറ്റുകൾ ഒഴിവുണ്ടാവും അപ്പോൾ കയറി വരുന്ന TTE യോട് പറഞ്ഞാൽ അവര് വേറെ
സീറ്റ് അറേഞ്ച് ചെയ്ത് തരും

അത്രയും പറഞ്ഞ് TTE നടന്ന് പോയപ്പോൾ ആ യുവതി എന്നെ നോക്കി പുഞ്ചിരിച്ചിട്ട് കൈകൂപ്പി താങ്ക്സ് പറഞ്ഞു

ഞാൻ പിന്നെ മോഹൻലാല് പറയുന്നത് പോലെ വിത്ത്പ്ളഷറെന്നൊക്കെ പറഞ്ഞു ജാഡയിലങ്ങനെ ഇരിക്കുമ്പോഴാണ് ടൊയ്‌ലറ്റിൽ പോയിരുന്ന കൂട്ടുകാരൻ കടന്ന് വന്നത്

അവൻ നോക്കുമ്പോൾ അവൻ്റെ സീറ്റിൽ ഒരു സ്ത്രീയും കുട്ടിയുമിരിക്കുന്നു

ഹലോ മേഡം, ഇതെൻ്റെ സീറ്റാണ് ഒന്നെഴുന്നേലക്കാവോ ?

ഡാ ,ഡാ ” ഞാനാണ് അവരോട് അവിടെ ഇരുന്നോളാൻ പറഞ്ഞത് ,നീ തത്കാലം ഇവിടെയിരുന്നോളു ,

ഞാനെഴുന്നേറ്റിട്ട് ബഹളം വയ്ക്കാനൊരുങ്ങിയ കൂട്ടുകാരനെ
അവിടെ പിടിച്ചിരുത്തി

അല്ലാ, കൂട്ടുകാരൻ കയറിയില്ലെന്നല്ലേ?
ആ മേഡത്തോട് നേരത്തെ പറഞ്ഞത് ?

യുവതി എന്നോട് അമ്പരപ്പോടെ ചോദിച്ചു

അതേ, അന്നേരം അവരോട് എനിക്കങ്ങനെ ഒരു കളവ് പറയാനാണ് തോന്നിയത് ,ഇല്ലെങ്കിൽ സുഖമില്ലാത്ത കുട്ടിയെയും കൊണ്ട് ,നിങ്ങള് ബുദ്ധിമുട്ടേണ്ടി വരില്ലേ? പിന്നെ, പേടിക്കണ്ട കാര്യമൊന്നുമില്ല , ഇനി അടുത്ത TTE കയറുന്നത്, ആലപ്പുഴയിൽ നിന്നാണ് ,അത് വരെ സമാധാനമായിരുന്നോളു ,

അപ്പോൾ നിങ്ങളത് വരെ നിന്ന് യാത്ര ചെയ്യണ്ടേ?

ഓഹ് അത് സാരമില്ല ഇടയ്ക്ക് ഞാൻ അവനെ എഴുന്നേല്പിച്ചിട്ട് ഇരുന്നോളാം
നോ പ്രോബ്ളം

ഓ ഗോഡ്, നിങ്ങളോട് എങ്ങനെ നന്ദി പറയണമെന്നെനിക്കറിയില്ല , ഓൾറെഡി ഞാൻ വല്ലാത്തൊരു മാനസിക സംഘർഷത്തിലൂടെയാണ് കടന്ന് പോകുന്നത് ,അതിനൊപ്പം, കുട്ടിക്ക് വയ്യാതെ കൂടെ വന്നാൽ ,എനിയ്ക്ക് ഒറ്റയ്ക്ക് മാനേജ് ചെയ്യാൻ പറ്റാതെ വന്നേനെ , ഒത്തിരി നന്ദി കെട്ടോ,

ഹേയ് എന്തിന് ? ഇതൊക്കെ ഞാൻ സാധാരണ ചെയ്യുന്ന കാര്യങ്ങളാണ്

ഞാൻ വീണ്ടും ജാഡയിട്ടപ്പോൾ കൂട്ടുകാരൻ രൂക്ഷമായിട്ട് എന്നെ നോക്കി പല്ലിറുമ്മുന്നുണ്ടായിരുന്നു , കാരണം .അവൻ ഞാനുമായി അടിയിട്ടായിരുന്നു ,ആ വിൻഡോ സീറ്റിൽ കയറിയിരുന്നത്, എല്ലാം സഹിക്കാം ട്രെയിനിലോ ബസ്സിലോ വിൻഡോ സീറ്റ് നഷ്‌ടപ്പെട്ടാൽ അവൻ സഹിക്കില്ല

പിന്നെ ഞാനും ആ യുവതിയുമായി നല്ല ചങ്ങാത്തത്തിലായി, വീണ്ടും ഞാൻ ബാഗിലിരുന്ന കുർകുറെയെടുത്ത് ആ കുട്ടിക്ക് നീട്ടിയപ്പോൾ കുട്ടി വീണ്ടും അവളുടെ അമ്മയെ നോക്കി

മേടിച്ചോളു , ,

പുഞ്ചിരിയോടെ യുവതി അനുവാദം കൊടുത്തപ്പോൾ നാണത്തോടെ ആ കുട്ടി എൻ്റെ കൈയ്യിൽ നിന്നും കുർകുറെ വാങ്ങി

എനിക്ക് വാങ്ങിച്ചില്ലേടാ?

എത്തിവലിഞ്ഞ് എൻ്റെ കൈത്തണ്ടയിൽ നുള്ളിക്കൊണ്ട് നീരസത്തോടെ കൂട്ടുകാരൻ ചോദിച്ചു

ഇല്ലടാ,, നിനക്ക് വയറിന് സുഖമില്ലാതിരിക്കുവല്ലേ ? ഇനി കുർക്കുറെ കൂടി തിന്നിട്ട് വീണ്ടും നിനക്ക് ടോയ്ലറ്റിൽ പോകാൻ മുട്ടിയാലോ?

ഞാനത് ഇത്തിരി ഉറക്കപ്പറഞ്ഞത് അവന് അപമാനമായി തോന്നി, അരിശത്തോടെയവൻ പെട്ടന്ന് മുഖം തിരിച്ച് പുറത്തേയ്ക്ക് നോക്കിയിരുന്നു

എന്തേലും പ്രോബ്ളമുണ്ടോ? കയറിയപ്പോൾ മുതൽ ഞാൻ ശ്രദ്ധിക്കുന്നു , ആകെ ഗ്ളൂമിയായിരിക്കുന്നു ? അല്ല പറയാൻ ബുദ്ധിമുട്ടുണ്ടെങ്കിൽ വേണ്ട , വ്യക്തിപരമായ കാര്യങ്ങൾ തുറന്ന് പറയാനും മാത്രമുള്ള അടുപ്പമൊന്നും നമ്മള് തമ്മിൽ ഇല്ലല്ലോ ? ഞാൻ വെറുതെ ചോദിച്ചെന്നേയുള്ളു , ,

നിർദ്ദോഷിയെപ്പോലെ ഞാനാ യുവതിയോട് ചോദിച്ചു.

ഹേയ് നിങ്ങളിപ്പോൾ എൻ്റെ ബെസ്റ്റ് ഫ്രണ്ടല്ലേ?പറയാൻ ബുദ്ധിമുട്ടൊന്നുമില്ല
പക്ഷേ ഇപ്പോൾ ഇവിടെ വച്ച് പറയാൻ നേരിയ ബുദ്ധിമുട്ടുണ്ട് , ഫോൺ നമ്പര് തന്നാൽ, TVM എത്തിയിട്ട് ഞാൻ രാത്രിയിൽ വിളിക്കാം അപ്പോൾ പറഞ്ഞാൽ പോരെ ?

മതി അത് മതി

അവള് പറഞ്ഞതിൽ ന്യായമുണ്ട് കാരണം എന്നോട് പറയുന്ന കാര്യങ്ങൾ അടുത്തിരിക്കുന്നവരും കേൾക്കും അത് കൊണ്ട് ഞാനവൾക്ക് എൻ്റെ നമ്പര് കൊടുത്തു രാത്രിയിൽ വിളിക്കുന്നതും കാത്ത് ഞാനിരിക്കുകയാണ് , എൻ്റെ ഊഹം ശരിയാണെങ്കിൽ അവൾ ഭർത്താവുമായി പിണങ്ങിയിട്ട് മകളെയുമെടുത്ത് സ്വന്തം വീട്ടിലേയ്ക്ക് പോകുന്നതായാണ് എനിക്ക് തോന്നുന്നത് കാരണം വലിയ രണ്ട് ലഗ്ഗേജുകളുമായിട്ടാണ് അവളുടെ യാത്ര
അവളുടെ വിളിക്കായി ആകാംക്ഷയോടെ ഞാൻ കാത്തിരിക്കുന്നു