ഇക്കാ ഞമ്മക്കൊരു ഫോട്ടോ എടുത്താലോ .. ഓൾടെ അടുത്ത ആഗ്രഹം വന്നപ്പോ പറ്റില്ല എന്ന് തറപ്പിച്ചു പറഞ്ഞതാണ് .. പക്ഷെ ഓള് വിട്ടില്ല……

എഴുത്ത് :- സൽമാൻ സാലി

” ഇക്കാ ഇവിടെ ഞമ്മളല്ലേ ഉള്ളൂ പിന്നെന്താ ഇങ്ങക്ക് നിന്നുതന്നാൽ ..

” ഷാഹീ ഇയ്യ്‌ കളിക്കല്ലേ .. അയിനൊന്നും ന്നെ കിട്ടൂല ..!!

ഉച്ചക്ക് ചോറും തിന്ന് ഒന്ന് കിടന്നതാണ് അപ്പോളാണ് മക്കൾ അടുത്ത് വന്നത് ..

” ബാപ്പക്ക് മെയ്ക്കപ്പ് ഇടണോ .. ?

കയ്യിൽ കുറെ ടോയ്സും പിടിച്ചോണ്ട് യൂട്യൂബിൽ കാർട്ടൂൺ കണ്ടു അതിൽ കണ്ടത് പോലെ മെയ്ക്കപ്പ് ഇടാൻ വന്നതാണ് രണ്ടാളും …

ഞാൻ സമ്മതം മൂളി കണ്ണുമടച്ചു കിടന്നുകൊടുത്തു .. അവർ കയ്യിൽ കിട്ടിയ കളിപ്പാട്ടങ്ങൾ അവരുടെ മെയ്ക്കപ്പ് ടൂൾസ് ആക്കി ന്റെ മോന്തമ്മൽ പണി നടത്തുമ്പോളാണ് കെട്യോളുടെ വരവ് .. കുട്ടികളുടെ കളി കണ്ടപ്പോൾ ഓൾക് ഒരു പൂതി ന്നെ മെയ്ക്കപ്പ് ഇടണം എന്ന് ..

ആദ്യം കുറെ പറ്റില്ല എന്നൊക്കെ പറഞ്ഞെങ്കിലും ഓൾടെ മുഖം കണ്ടപ്പോ അവരുടെ സന്തോഷം അല്ലെ ന്റെ സന്തോഷം എന്നോർത്ത് ഞാൻ സമ്മതിച്ചു ..

ഷാഹി ഓൾടെ കയ്യിലെ മുഴുവൻ ടൂൾസും വെച് എന്റെ മുഖത്ത് പെയ്ന്റടിച്ചു കഴിഞ്ഞു ഓൾടെ ഒരു തട്ടവും എടുത്തു എനിക്ക് ചുറ്റിച്ചു തന്നപ്പൊ മക്കളൊക്കെ ഭയങ്കര ചിരി ..

കണ്ണാടിയിൽ നോക്കിയപ്പോ കുറച് താടി ഉണ്ടെന്നേ ഉള്ളൂ .. കാണാൻ നല്ല മൊഞ്ചൊക്കെ ഉണ്ട് ..

” ഇക്കാ ഞമ്മക്കൊരു ഫോട്ടോ എടുത്താലോ .. ഓൾടെ അടുത്ത ആഗ്രഹം വന്നപ്പോ പറ്റില്ല എന്ന് തറപ്പിച്ചു പറഞ്ഞതാണ് .. പക്ഷെ ഓള് വിട്ടില്ല ..

എന്നേം കൂട്ടി ഡോറിന്റെ അടുത്ത് നിർത്തി ഫോട്ടോ ഷൂട്ട് തുടങ്ങി .. ലുങ്കി മുണ്ടും തലയില് തട്ടവും ഇട്ട് മേക്കപ്പും ഇട്ടോണ്ട് ഫോട്ടോ എടുക്കുമ്പോളാണ് കോളിങ് ബെല്ലടിഞ്ഞത് ..

ഡോറിന്റെ അടുത്ത ആയതു കൊണ്ട് ബെല്ല് കേട്ടപാടെ ഞാൻ കേറി ഡോർ തുറന്നതും അപ്പുറത്തെ ഫ്‌ലാറ്റിലെ ഇക്ക മുന്നിൽ ”നാക്ര്തന തിന നാ .. നാക്ര്താന ദിനനാ എന്ന മൂസിക്കാണ് എന്റെ മനസ്സിൽ വന്നത് … എന്നെ കണ്ടതും അങ്ങേര് വാ പൊളിച്ചു നിന്നുപോയി ..

അല്ലേലും ലുങ്കി മുണ്ടും ഉടുത്ത് തട്ടവും ചുറ്റി ലിപ്സ്റ്റിക്കും ഇട്ടോണ്ട് വാതിൽ തുറന്നാൽ അങ്ങേര് അല്ല ആരായാലും വാ പൊളിച്ചുപോകും

പണി പാലും വെള്ളത്തിൽ കിട്ടായതോർത്ത് ഞാൻ ഓടിച്ചെന്ന് ബാത്‌റൂമിൽ കേറി എല്ലാം കഴുകി പുറത്തിറങ്ങിയപ്പോഴേക്കും അങ്ങേര് പോയിരുന്നു ..

വെള്ളിയാഴ്ച ഉച്ചക്ക് അങ്ങേരുടെ വീട്ടീന്ന് ഭക്ഷണം കഴിക്കാൻ വേണ്ടി വിളിക്കാൻ വന്നതായിരുന്നു അങ്ങേര് …

ആകെ എടങ്ങാറായി മാനം കെട്ട് നാറി .. അങ്ങേര് കാണാതെ ഫ്‌ലാറ്റിലെ കോണിപ്പടി ഇറങ്ങി കടയിലേക്ക് പോകാൻ നേരം പിന്നിന്നൊരു വിളി

” സാലിയെ സംഗതി ഉസാറായ്ക്ക്ണു ട്ടോ .. എന്നും പറഞ്ഞു അങ്ങേരുടെ ഒരു വളിച്ച ചിരി …

ഇനി ഇപ്പൊ നാളെ ഉച്ചക്ക് അങ്ങേരുടെ മുന്നിൽ ഇരുന്ന് ഭക്ഷണം കഴിക്കേണ്ടി വരുമല്ലോ എന്നോർക്കുമ്പോൾ നാളെ ആവണ്ടയ്‌നും എന്ന് കരുതുവാ ..

ഏത് കഷ്ടകാലത്തിനാണാനാവോ ഞാൻ ഈ പരി പാടിക്ക്‌ നിന്ന് കൊടുത്തത് .. അല്ലെങ്കിലും കിട്ടേണ്ട പണി കൃത്യ സമയത് വാതിലിന് മുട്ടി കടന്നു വരുന്നത് ഞമ്മക്ക് പതിവാണല്ലോ …