രചന:-തൈപ്പറമ്പൻ
എൻ്റെ അമ്മായി അമ്മയ്ക്ക് രണ്ട് ഭർത്താക്കന്മാരുണ്ട്
അതായത് എനിയ്ക്ക് രണ്ട് അമ്മായി അപ്പൻമാരുണ്ടെന്ന് സാരം
വിവാഹാലോചന വന്നപ്പോൾ തന്നെ ഞാനീ വിവരമറിഞ്ഞതാണ്അ ന്നെനിയ്ക്കൊരു വല്ലായ്ക തോന്നിയെങ്കിലും ശ്രീയേട്ടൻ്റെയൊപ്പം ജീവിതം തുടങ്ങിയപ്പോൾ ഞാനതുമായി പൊരുത്തപ്പെട്ടു.
ശ്രീയേട്ടൻ രണ്ട് പേരെയും അച്ഛനെന്ന്ത ന്നെ വിളിക്കുന്നത് കൊണ്ട് യഥാർത്ഥ അച്ഛനാരാണെന്ന് അദ്ദേഹത്തോട് ചോദിയ്ക്കാൻ അന്ന് എനിയ്ക്കൊരു
മടി തോന്നി
വിവാഹദിവസം രണ്ട് അച്ഛൻമാരും ഒരുപോലെ ഓടി നടന്ന് എല്ലാ കാര്യങ്ങളും ഉത്തരവാദിത്തത്തോടെ ചെയ്യുന്നുണ്ടായിരുന്നു
അത്പോലെ ഇടയ്ക്കിടെ അവർ അമ്മയുടെ അടുത്ത് അഭിപ്രായങ്ങൾ തേടി പോകുന്നതും കണ്ടപ്പോൾ ആദ്യ ഭർത്താവാരാ രണ്ടാമത്തെയാളാരാണെന്ന് അപ്പോഴും എനിയ്ക്ക് കണ്ടെത്താനായില്ല
അന്ന് രാത്രി ആരോടൊപ്പമായിരിക്കും അമ്മായിഅമ്മ അന്തിയുറങ്ങുന്നതെന്ന കൗതുകം എന്നിലുണ്ടായിരുന്നെങ്കിലും ഞങ്ങടെ ആദ്യരാത്രിയായത് കൊണ്ട് , നേരത്തെ തന്നെ ,എല്ലാവരും കൂടെ എന്നെയും ശ്രീയേട്ടനേയും അലങ്കരിച്ച മുറിയിലേയ്ക്ക് ത.ള്ളിവിട്ടിരുന്നു .
പിറ്റേന്ന് നേരത്തെ ഉണർന്ന ഞാൻ കുളിച്ച് ഫ്രഷായി അടുക്കളയിലെത്തുമ്പോൾ കണ്ട കാഴ്ച എന്നെ വീണ്ടും അത്ഭുതപ്പെടുത്തി
അമ്മ പുട്ടിനുള്ള മാവ് നനയ്ക്കുമ്പോൾ അച്ഛൻമാരിൽ ഒരാൾ തേങ്ങ തിരുകുന്നു മറ്റെയാൾ പയറരിയുന്നു ,
കല്യാണത്തിന് അധികമാരുമില്ലായിരുന്നു വന്നവരൊക്കെ തലേദിവസമേ തിരിച്ച് പോയിരുന്നു.
ങ്ഹാ മോള് രാവിലെ എന്താ കുടിക്കുന്നത്? ചായയോ കാപ്പിയോ ?
എന്നെ കണ്ടപ്പോൾ അമ്മായി അമ്മ ചോദിച്ചു
കോഫിയാണ് ശീലം, ഞാനിട്ട് കുടിച്ചോളാം അമ്മേ ,
വിനയത്തോടെ ഞാൻ പറഞ്ഞു
ഹേയ് അതിൻ്റെ ആവശ്യമില്ല എനിയ്ക്കും കാപ്പി ശീലമായത് കൊണ്ട് ഞാനത് രാവിലെ തന്നെ തിളപ്പിച്ച് വച്ചിട്ടുണ്ട് .
അച്ഛൻമാരിലൊരാളാണത് പറഞ്ഞത്എ ന്നിട്ട് അദ്ദേഹം തന്നെ, ഒരു കപ്പിൽ എനിയ്ക്ക് കാപ്പി ഒഴിച്ച് തന്നു.
ഞങ്ങള് രാവിലെ കഴിക്കാൻ ,ഇഡലി, ദോശ പുട്ട് മുതലായവയാണ് ഉണ്ടാക്കുന്നത് മോൾക്കെന്താ ഇഷ്ട്ടം ?
ഹേയ് എനിയ്ക്കങ്ങന്നെ പ്രത്യേകിച്ചിഷ്ടമൊന്നുമില്ല എല്ലാം കഴിക്കും
പിന്നെ നോൺ വെജും ഇഷ്‌ടമാണ്
ചെറു പുഞ്ചിരിയോടെ ഞാൻ പറഞ്ഞു.
അതിനെന്താ ? നാളെ നമുക്ക് നോൺ വെജാക്കാം പോരെ ?
അമ്മയാണത് പറഞ്ഞത്
മൂന്ന് പേരും എന്നോട് വളരെയധികം സ്‌നേഹത്തോടെയാണ് പെരുമാറിയിരുന്നത് അത് കൊണ്ട് തന്നെ ആദ്യ ദിവസം ഞാൻ വളരെയധികം ഹാപ്പിയായിരുന്നു
എങ്കിലും ശ്രീയേട്ടൻ്റെ അച്ഛനാരാണെന്നറിയാനുള്ള വ്യഗ്രത എൻ്റെ മനസ്സിൽ ഒരു ഭാരമായി മാറിയിരുന്നു
ഒടുവിൽ അന്ന് രാത്രിയിൽ രണ്ടും കല്പിച്ച് ശ്രീയേട്ടനോട് ഞാനത് ചോദിച്ചു.
ഇതേ സംശയം ഓർമ്മ വച്ചനാള് മുതൽ എനിക്കുമുണ്ട് സ്കൂളിൽ പോകുമ്പോൾ കൂട്ടുകാര് കളിയാക്കി ചോദിയ്ക്കുന്നത് സഹിക്കാതെയാണ് ഒരു ദിവസം അമ്മയോട് ഞാനത് ചോദിച്ചത് അപ്പോൾ അമ്മ പറഞ്ഞ മറുപടി എന്താണെന്നറിയുമോ? ഒരാളെ ചൂണ്ടി നിൻ്റെ അച്ഛനാണെന്ന് ഞാൻ പറഞ്ഞാൽ പിന്നെ നീ അയാളെ മാത്രമേ ആത്മാർത്ഥമായി സ്നേഹിക്കുകയുള്ളുവെന്ന്അ ത് കൊണ്ട് ഈ നിമിഷം വരെ എനിയ്ക്കും അറിയില്ല അവരിലാരാണ് എൻ്റെ യഥാർത്ഥ അച്ചനെന്ന് ,എനിയ്ക്കൊരു മൂന്ന് വയസ്സുള്ളപ്പോഴാണ്, മുംബൈയിൽ നിന്നും ഞങ്ങള് നാല് പേരും ഇവിടെ താമസിക്കാനായി വന്നത് ,അത് കൊണ്ട് യഥാർത്ഥ്യമെന്താണെന്ന് നാട്ടുകാർക്കുമറിയില്ല,
ശ്രീയേട്ടനും കൈമലർത്തിയപ്പോൾ ഞാൻ നിസ്സഹായയായിപ്പോയി
രണ്ട് ദിവസങ്ങൾക്ക് ശേഷം ശ്രീയേട്ടൻ ഓഫീസിലേയ്ക്കും അച്ഛൻമാർ രണ്ട് പേരും ടൗണിൽ സാധനങ്ങൾ വാങ്ങിക്കാനുമായി പോയപ്പോഴാണ്, വെറുതെ ഫോണിൽ തോണ്ടിക്കൊണ്ടിരുന്ന എൻ്റെ അരികിലേയ്ക്ക് അമ്മ മുറത്തിൽ കുറച്ച് അരിയുമായി വന്നിരുന്നത്
മോൾക്കിവിടെ ബുദ്ധിമുട്ടൊന്നുമില്ലല്ലോ ? എന്തേലുമുണ്ടെങ്കിൽ പറയാൻ മടിക്കണ്ടാട്ടോ ?
ഹേയ് ഞാൻ ഹാപ്പിയാണമ്മേ , ,
എന്നുമങ്ങനെ തന്നെയായിരിക്കണേ എന്ന് ഈശ്വരനോട് മനസ്സിൽ പറഞ്ഞിട്ടാണ് ഞാൻ മറുപടി പറഞ്ഞത്
മോൾക്ക് ഇവിടുത്തെ രീതികളൊക്കെ കണ്ടിട്ട് ചില സംശയങ്ങളൊക്കെയുണ്ടല്ലേ? അമ്മയ്ക്കെന്തിനാ രണ്ട് ഭർത്താക്കന്മാര് ?പിന്നെ ,,ശ്രീകുമാറിൻ്റെ യഥാർത്ഥ അച്ഛനാരാ ? എന്നൊക്കെ ?, അതിൽ ആദ്യത്തെ ചോദ്യത്തിനുത്തരം ഞാൻ പറയാം , ദിവാകരനെന്നും ചന്ദ്രനെന്നുമാണ് രണ്ട് പേരുടെയും പേരുകളെന്ന് മോർക്കറിയാമല്ലോ ? അതിൽ മൂത്തയാളായ ദിവാകരനായിരുന്നു എന്നെ വിവാഹം കഴിച്ചത് , അപ്പോഴാണ് ഗുരുതരമായൊരു രോഗം ബാധിച്ച് അവരുടെ അമ്മ കിടപ്പിലായത് , ചികിത്സിച്ച ഡോക്ടർമാർ പറഞ്ഞത് അമ്മ ഇനി അധികനാൾ ജീവിച്ചിരിക്കില്ല അത് കൊണ്ട് അമ്മയ്ക്ക് എന്തെങ്കിലും ആഗ്രഹങ്ങൾ ഉണ്ടെങ്കിൽ അത് സാധിച്ച് കൊടുക്കണമെന്നും അമ്മയെ വേദനിപ്പിക്കുന്ന കാര്യങ്ങളൊന്നും ഉണ്ടാകാതെ നോക്കണമെന്നുമാണ് അങ്ങനെയിരിക്കെ ഒരു ദിവസം അമ്മ ദിവാകരേട്ടനെ വിളിച്ചിട്ട് ചന്ദ്രൻ്റെ കൂടി കല്യാണം നടന്ന് കാണണമെന്നും എവിടുന്നെങ്കിലും ഒരു പെണ്ണ് കണ്ട് പിടിച്ച് എത്രയും വേഗം കല്യാണം നടത്തണമെന്നും പറഞ്ഞു. അങ്ങനെ ദിവാകരേട്ടൻ പലരോടും അന്വേഷിച്ച് രണ്ട് മൂന്ന് സ്ത്രീകളെ പോയി കണ്ടു ,പക്ഷേ ചന്ദ്രൻ്റെ ജാതകം പാപജാതകമായിരുന്നത് കൊണ്ട് ആരും തന്നെ ,തൻ്റെ പെൺമക്കളെ ചന്ദ്രന് കെട്ടിച്ച് കൊടുക്കാൻ തയ്യാറായില്ല , അമ്മ ഈ വിവരമറിഞ്ഞപ്പോൾ അമ്മയ്ക്കത് വിഷമമായി ,എൻ്റെ കണ്ണടയുന്നതിന് മുമ്പ് ചന്ദ്രൻ്റെ വിവാഹം എനിയ്ക്ക് നടന്ന് കാണണം ,അവനൊരു ജീവിതം കിട്ടാതെ ഞാൻ മരിച്ച് പോയാൽ, എൻ്റെ ആത്മവിന് പോലും ശാന്തിയിട്ടില്ല, മോളെ, നീയും ദിവാകരനും വിചാരിച്ചാൽ ,അമ്മയ്ക്ക് സന്തോഷത്തോടെ മരിക്കാൻ കഴിയും
അമ്മ അങ്ങനെ പറഞ്ഞപ്പോൾ ഞാനും ദിവാകരേട്ടനും ഒന്നും മനസ്സിലാകാതെ പരസ്പരം നോക്കി.
ദിവാകരാ നീ എതിർപ്പൊന്നും പറയരുത് മോളേ അമ്മയുടെ അന്ത്യാഭിലാഷമാണ് ചന്ദ്രനെ കൂടി നീ ഭർത്താവായി കാണണം
അത് കേട്ട് ഞാൻ ഞെട്ടിപ്പോയി
അമ്മേ ഞാനെങ്ങനെയാണമ്മേ എൻ്റെ ദിവാകരേട്ടൻ്റെയൊപ്പം മറ്റൊരാളെ കാണുന്നത് ?
നിസ്സഹായതയോടെ ഞാൻ അമ്മയോട് ചോദിച്ചപ്പോൾ ദിവാകരേട്ടൻ എൻ്റെ വായ പൊത്തി ,
ഓർമ്മ വച്ച നാള് മുതൽ അമ്മയാണ് ഞങ്ങളെ രണ്ട് പേരെയും കഷ്‌ടപ്പെട്ട് വളർത്തിയത് ,എന്ത് വാങ്ങിയാലും ഞങ്ങൾക്ക് രണ്ട് പേർക്കും ഒരുപോലെ തന്നെയാണ് അമ്മ ഇത് വരെ വാങ്ങി തന്നിട്ടുള്ളത് ,ചെറുപ്പത്തിൽ ഞങ്ങൾ എന്താഗ്രഹം പറഞ്ഞാലും എത്ര കഷ്ടപ്പെട്ടിട്ടാണെങ്കിലും അമ്മയത് ഞങ്ങൾക്ക് വാങ്ങി തരുമായിരുന്നു, അത് കൊണ്ട് ,അമ്മയുടെ അന്ത്യാഭിലാഷം സാധിച്ച് കൊടുക്കേണ്ടത് എൻ്റെ ബാധ്യതയാണ് ,നീ ചന്ദ്രൻ്റെ കൂടി ഭാര്യയായാലും എനിയ്ക്ക് നിന്നോടുള്ള സ്‌നേഹം കുറയുകയില്ല ,അത് കൊണ്ട് അമ്മയോട് നീ സമ്മതമാണെന്ന് പറയ്
ദിവാകരേട്ടനെ എനിയ്ക്ക് എതിർക്കാൻ കഴിയില്ലായിരുന്നു, അത് കൊണ്ട് മനസ്സില്ലാമനസ്സോടെയാണ് ഞാനന്ന് സമ്മതം മൂളിയത്, പക്ഷേ പിന്നീടങ്ങോട്ട് രണ്ട് ഭർത്താക്കന്മാരുമായി ഞാൻ ജീവിക്കാൻ ശീലിച്ചു , ഇതിനിടയിൽ അമ്മ മരണപ്പെട്ടു, പിന്നെയും ഒരു വർഷം കൂടി കഴിഞ്ഞാണ് ഞങ്ങൾക്ക് ശ്രീമോൻ ജനിക്കുന്നത് താഴത്തെ രണ്ട് മുറികളിൽ ഒന്ന് ദിവാകരേട്ടൻ്റെയും, മറ്റൊന്ന് ചന്ദ്രൻ്റെയുമാണ്, ഒന്നിടവിട്ട ദിവസങ്ങളിൽ ഞാൻ രണ്ട് മുറിയിലും അന്തിയുറങ്ങും ,ശ്രീമോൻ്റെ അച്ഛൻ ആരുടേതാണെന്ന് എനിയ്ക്ക് മാത്രമേ അറിയൂ , അത് അച്ഛൻമാരോട് ഞാൻ പറയാത്തത് മറ്റൊന്നുമല്ല, അവർക്കവനോടുള്ള സ്നേഹത്തിൽ തരിമ്പും കുറവുണ്ടാകാതിരിക്കാനാണ്, ആ രഹസ്യം ,മരണം വരെ എൻ്റെ മനസ്സിൽ തന്നെ കിടക്കും,,
അമ്മയത് പറഞ്ഞ് നിർത്തുമ്പോൾ , എൻ്റെ കണ്ണുകൾ ഈറനണിഞ്ഞത് മറ്റൊന്നുമല്ല
മകനോടുള്ള സ്നേഹത്തിന് ഭംഗം വരാതിരിക്കാൻ ,അച്‌ഛൻമാരോടും, അവരോടുള്ള സ്നേഹത്തിന് വ്യത്യാസം വരാതിരിക്കാൻ, മകനോടും അ വലിയ രഹസ്യമൊളിപ്പിച്ച അമ്മയെക്കുറിച്ചോർത്തപ്പോഴാണ് ,
NB:- ഇത് വായിച്ചിട്ട് നടക്കാത്ത കഥ എന്നാരും വിധിയെഴുതണ്ട ,പല കാരണങ്ങൾ കൊണ്ടും ഇപ്പോഴും രണ്ട് ഭർത്താക്കന്മാരുമായി ജീവിക്കുന്ന സ്ത്രീകളെ എനിയ്ക്ക് നേരിട്ടറിയാം😊
.