രചന:-തൈപ്പറമ്പൻ
ദുബായിലുള്ള ഭർത്താവിൻ്റെ ഫ്ളാറ്റിൽ ഞാനെത്തിയിട്ട് രണ്ട് ദിവസമാകുന്നു
അദ്ദേഹത്തിൻ്റെ തിരക്ക് കാരണം ഔട്ടിങ്ങിനൊന്നും പോകാൻ ഇതുവരെ കഴിഞ്ഞിട്ടില്ല
മൂന്നാം നിലയിലെ ഫ്ളാറ്റിൻ്റെ ബാൽക്കണിയിലിരുന്നാൽ തിരക്കേറിയ റോഡും വലത് വശത്തെ ഫുട്ബോൾ മൈതാനവും കാണാം
ഇവിടെ വന്നതിന് ശേഷം പ്രത്യേകിച്ച് ജോലിയൊന്നുമില്ലാത്തത് കൊണ്ട് മൊബൈൽ കണ്ട് മടുക്കുമ്പോൾ രണ്ട് ദിവസമായി ബാൽക്കണിയിൽ വന്നിരുന്ന് നേരം കളയും
ഉച്ചയ്ക്ക് ഞാൻ തിരികെ വന്നിട്ട് നമുക്ക് പുറത്ത് പോയി ലഞ്ച് കഴിക്കാമെന്ന് പറഞ്ഞാണ് ദേവൻ രാവിലെ പോയതെങ്കിലും, വരാൻ താമസിക്കുമെന്നും നിനക്കുള്ള ഫുഡ് സൊമാറ്റോയിൽ നിന്നും പാഴ്സല് വരുമെന്നും പറഞ്ഞ് കുറച്ച് മുൻപ് അദ്ദേഹം വിളിച്ചപ്പോൾ ആദ്യമൊരു നീരസം തോന്നി .
പിന്നീടാണ് ദേവൻ്റെ ജോലിത്തിരക്കിനെ കുറിച്ച് ഞാൻ ബോധവതിയായത്
അല്പം കഴിഞ്ഞപ്പോൾ ഞങ്ങളുടെ ഫ്ലാറ്റിന്റെ ഗേറ്റ് കടന്ന് ,സൊമാറ്റോ ബാഗ് ചുമലിൽ തൂക്കിയ ഒരു ചെറുപ്പക്കാരൻ ബൈക്കിൽ വരുന്നത് കണ്ട് ഞാനയാളെ നോക്കി നിന്നു.
വലിയ കാർപോർച്ചിനരികിൽ ബൈക്ക് നിർത്തി ,തലയിൽ നിന്നയാൾ ഹെൽമറ്റ് മാറ്റിയപ്പോഴാണ് ,ഞാൻ ശരിക്കും ഞെട്ടിപ്പോയത്
സുമേഷായിരുന്നത് ,
മൂന്ന് മാസങ്ങൾക്ക് മുൻപാണ് അവസാനമായി അവനുമായി കണ്ട് മുട്ടിയത്.
തൻ്റെ വിസ വന്നിട്ടുണ്ടെന്നും ,പോയി ഒന്ന് സെറ്റിൽഡായിട്ട് വന്ന് ,നിൻ്റെ അച്ഛനോട് നമ്മുടെ കാര്യം പറയാമെന്നും ,അത് വരെ നീ കാത്തിരിക്കണമെന്നും പറഞ്ഞാണ് അന്ന് പിരിഞ്ഞത് . പക്ഷേ !
ഇതികർത്തവ്യതാമൂഢയായി ഞാൻ നിന്നു.
എൻ്റെ നെഞ്ചിടിപ്പ് കൂടി , ശ.രീരം വെ.ട്ടിവിയർത്തു.
സുമേഷിപ്പോൾ ഫ്ളാറ്റിന് മുന്നിലെത്തിയിട്ട് കോളിങ് ബെല്ലമർത്തും, ഞാൻ ചെന്ന് വാതില് തുറക്കുമ്പോൾ സുമംഗലയായ എന്നെ കണ്ട് അയാൾ ഞെട്ടും,
പാവം സുമേഷ്, എന്നെ സ്വന്തമാക്കാനായി ഈ മരുഭൂമിയിലെ പൊള്ളുന്ന വെയിലത്ത് വിശ്രമമില്ലാത കിടന്ന് കഷ്ടപ്പെടുമ്പോൾ അവന് വേണ്ടി കാത്തിരിക്കാതെ ഞാൻ മറ്റൊരാളുടെ ഭാര്യയായി സുഖലോലുപതയിൽ കഴിയുകയാണെന്നറിയുമ്പോൾ അവനത് താങ്ങാൻ കഴിയില്ല
ഈശ്വരാ, എന്നെ ഇങ്ങനെ പരീക്ഷിക്കല്ലേ ഈ പ്രതിസന്ധിയിൽ നിന്ന് കരകയറാൻ
ഒരു ഉപായം തോന്നിക്കണേ
ദൈവത്തോട് പ്രാർത്ഥിച്ച് കൊണ്ട് ഞാൻ ഫ്രണ്ട് ഡോറിനടുത്ത് ചെന്ന് , CCTV ക്യാമറയുടെ സ്ക്രീനിൽ നോക്കി
ഡോറിന് മുന്നിലെത്തിയ സുമേഷ് ബെൻസ്വിച്ചമർത്തുന്നത് കണ്ട് എൻ്റെ തൊണ്ടക്കുഴി വരണ്ടു.
പെയ്മെൻറ് ചെയ്തതല്ലേ? പാഴ്സല് ഡോറിന് മുന്നിൽ വെച്ചോളൂ ഞാൻ എടുത്തോളാം,,
ഞാൻ ,എന്തായാലും ദുബായിൽ ഉണ്ടാവുമെന്ന് സുമേഷ് ഒരിക്കലും പ്രതീക്ഷിക്കില്ലെന്ന ഉറപ്പുകൊണ്ടാണ് അകത്ത് നിന്ന് അങ്ങനെ വിളിച്ച് പറഞ്ഞത്
അത് കേട്ട് തെല്ല് നേരം സംശയിച്ച് നിന്നിട്ട് , പാഴ്സല് പുറത്ത് വച്ച് സുമേഷ് തിരിച്ച് പോകുന്നത് കണ്ടപ്പോൾ മാത്രമാണ് എൻ്റെ ശ്വാസം നേരെ വീണത്.
ഡോറ് തുറന്ന് ഞാൻ ഫുഡ് അകത്ത് കൊണ്ട് വച്ചെങ്കിലും പഴയ ഓർമ്മകൾ തികട്ടി വന്നത് കൊണ്ട് എനിയ്ക്ക് തീരെ വിശപ്പ് തോന്നിയില്ല, ദേവൻ വരുന്നതിന് മുമ്പ് ഞാനതെടുത്ത് വെയ്സ്റ്റ് ബിന്നിലിട്ടു.
പിറ്റേന്ന് രാവിലെ ഓഫീസിലേക്ക് പോയപ്പോഴും ദേവൻ പറഞ്ഞത് ഉച്ചയ്ക്ക് വന്നിട്ട് പുറത്തുപോകാമെന്നായിരുന്നെങ്കിലും തലേ ദിവസത്തെ പോലെ ദേവൻ ബിസി ആയാലോ എന്ന് കരുതി ,ഞാൻ വേഗം അടുക്കളയിൽ കയറി ഉച്ചയ്ക്കത്തേയ്ക്കുള്ള ഫുഡ് റെഡിയാക്കി വച്ചിട്ട് ദേവനെ വിളിച്ച് പറഞ്ഞു.
ഇനി ഒരിക്കൽ കൂടി സുമേഷിനെ ഫേസ് ചെയ്യാനുള്ള മനക്കട്ടി എനിക്ക് ഇല്ലായിരുന്നു.
അങ്ങനെ ആ ദിവസവും കടന്നുപോയി പിറ്റേന്ന് എനിക്ക് പി.രീഡ്സായി ,സാധാരണ പോലെ, ബ്ലീ.ഡിങ്ങും വയ.റുവേദനയും കലശലായിട്ട് ഞാൻ ബെഡിൽ നിന്നും എഴുന്നേൽക്കാതെ കിടക്കുകയായിരുന്നു.
ദേവന് അന്നൊരു മീറ്റിംഗ് ഉള്ളതുകൊണ്ട് പോകാതിരിക്കാൻ കഴിയില്ലായിരുന്നു, പോയപ്പോൾ ഞാൻ പറഞ്ഞിരുന്നു ,എനിക്ക് പാഴ്സൽ ഒന്നും പറയണ്ട ,വൈകിട്ട് വരുമ്പോൾ നമുക്ക് പുറത്തുപോയി കഴിച്ചാൽ മതിയെന്ന് ,
അത് മറ്റൊന്നുമായിരുന്നില്ല പാഴ്സൽ കൊണ്ടുവരുന്നത് ,സുമേഷ് ആണെങ്കിലോ എന്ന ഭീതി എന്നെ വല്ലാതെ അലട്ടിയിരുന്നു.
പക്ഷേ കൃത്യം 12:00 മണി ആയപ്പോൾ ദേവൻ എന്നെ വിളിച്ചു.
എൻ്റെ സുഖ വിവരങ്ങൾ അന്വേഷിക്കാനാണ് വിളിച്ചതെങ്കിലും ഇന്ന് ഞാൻ നിനക്കായി ഒരു സ്പെഷ്യൽ ഫുഡ് ഓർഡർ ചെയ്തിട്ടുണ്ടെന്നും സൊമാറ്റോയിൽ നിന്നും ആളു വരുമെന്നും പറഞ്ഞപ്പോൾ ഞാൻ ഞെട്ടിപ്പോയി
ഈശ്വരാ,, ഇന്ന് ഫുഡ് കൊണ്ട് വരുന്നത് സുമേഷായിരിക്കരുതേ ഇനിയും എനിക്ക് മാനസികസമ്മർദ്ദം താങ്ങാനാവില്ല
ഞാൻ കണ്ണടച്ച് പ്രാർത്ഥിച്ചു
അല്പം കഴിഞ്ഞപ്പോൾ കോളിങ് ബെൽ കേട്ട് നെഞ്ചിപ്പോടെയാണ് ഞാൻ മെല്ലെ എഴുന്നേറ്റ് മുൻവശത്തേയ്ക്ക് ചെന്നത്.
അവിടെ വെച്ചോളൂ ഞാനെടുത്തു കൊള്ളാം
പുറത്തു നിൽക്കുന്നത് സുമേഷ് തന്നെയാണെന്ന് സ്ക്രീനിൽ കൂടെ കണ്ട ഞാൻ, തളർച്ചയോടെ വിളിച്ചു പറഞ്ഞു.
എൻ്റെ ശബ്ദം കേട്ടതും ,പാഴ്സല് നിലത്ത് വെച്ചിട്ട് തിരിഞ്ഞു നടക്കുന്ന സുമേഷിനെ കണ്ടപ്പോൾ ,എനിയ്ക്ക് ആശ്വാസമായി.
അയാൾ ബൈക്ക് സ്റ്റാർട്ട് ചെയ്തു തിരിച്ചു പോകുന്നത് കണ്ടാണ് ,ഡോറ് തുറന്ന് ഞാൻ പുറത്തിറങ്ങി പാഴ്സൽ കയ്യിലെടുത്തത്.
പക്ഷേ പാഴ്സലിന് മുകളിൽ ബില്ലിനൊപ്പം മറ്റൊരു പേപ്പർ കൂടി പിൻ ചെയ്തിരിക്കുന്നത് കണ്ട് ആകാംക്ഷയോടെ ഞാനതെടുത്ത് തുറന്നുനോക്കി.
അകത്ത് മറഞ്ഞിരുന്നിട്ട് വിളിച്ചു പറഞ്ഞാൽ നിന്നെ എനിക്ക് മനസ്സിലാവില്ലെന്ന് കരുതിയോ പ്രിയേ ? നിന്റെ ശബ്ദം മാത്രം കേട്ടാലും എത്ര വർഷങ്ങൾ കഴിഞ്ഞാലും നീ ലോകത്ത് എവിടെയിരുന്നാലും നിന്നെ എനിയ്ക്ക് തിരിച്ചറിയാൻ കഴിയും, കഴിഞ്ഞ ദിവസം ആദ്യമായി നിൻ്റെ ശബ്ദം കേട്ടപ്പോൾ ,അത് നീയാണോ ?എന്ന് എനിക്ക് സംശയം മാത്രമേ ഉണ്ടായിരുന്നുള്ളൂ ,ആ സംശയത്തിന്റെ പേരിലാണ് ,ഞാൻ നാട്ടിലേക്ക് വിളിക്കുന്നത് ,എല്ലാം അറിഞ്ഞിട്ടും ,
ഞാൻ വിഷമിക്കാതിരിക്കാനാണ് എൻ്റെ സുഹൃത്തുക്കളും ,വീട്ടുകാരും നിന്റെ വിവാഹക്കാര്യം എന്നെ അറിയിക്കാതിരുന്നതെന്ന് എനിയ്ക്ക് മനസ്സിലായി, നിന്നെയൊരു ഗൾഫുകാരനാണ് വിവാഹം കഴിച്ചതെന്നറിഞ്ഞപ്പോഴാണ് ,ഞാനന്ന് കേട്ട ശബ്ദം നിന്റേതാണെന്ന് ഒരിക്കൽക്കൂടി ഉറപ്പിച്ചത് ,എന്നിട്ടും മറ്റൊരാൾക്ക് കിട്ടിയ ഓർഡർ ചോദിച്ച് വാങ്ങി, ഞാൻ നിനക്ക് പാഴ്സലുമായി വന്നത് ,നിന്നെ കാണാൻ കഴിയുമെന്ന് വിചാരിച്ചിട്ടല്ല ,നിൻ്റെ ശബ്ദം അവസാനമായി ഒരിക്കൽ കൂടി കേൾക്കാനും ഈ എഴുത്ത് നിന്നെ കാണിക്കാനും കൂടി വേണ്ടിയായിരുന്നു ,നീ പേടിക്കേണ്ട പ്രിയേ, നിൻ്റെ സുഖകരമായ ദാമ്പത്യജീവിതത്തിൽ ആലോസരങ്ങൾ ഉണ്ടാക്കാനായി.ഒരിക്കലും ഞാനിനി വരില്ല ,
എൻ്റെ അച്ഛൻ എന്നോട് എപ്പോഴും പറയുന്ന ഒരു കാര്യമുണ്ട്. നമ്മൾ സ്വന്തമാക്കേണ്ടത് നമുക്ക് വിധിച്ചത് മാത്രമായിരിക്കണമെന്ന് ,.അത് നമ്മളിലേയ്ക്ക് എന്നായാലും താനേ വന്ന് ചേരുമെന്ന്,ഒരിക്കലും കായിക ബലം കൊണ്ടോ ,ആയുധബലം കൊണ്ടോ മറ്റൊരാൾക്ക് കിട്ടേണ്ടതൊന്നും നാം തട്ടിപ്പറിക്കരുതെന്ന് , ശരി ഞാൻ പോകുന്നു
Good bye,,,,
അതു മുഴുവൻ വായിച്ചു കഴിഞ്ഞപ്പോൾ എൻ്റെ കണ്ണുകൾ നിറഞ്ഞൊഴുകി, അതുവരെ ഞാനനുഭവിച്ചിരുന്ന എൻ്റെ ശാരീരിക വേദനകളൊക്കെ എങ്ങോ പോയിരുന്നു, പകരം എൻ്റെ ഹൃദയത്തിൽ നിന്നും രക്തം പൊടിയാൻ തുടങ്ങി,.പതിയെ പതിയെ വലിയൊരു പുഴയായി നിണമൊഴുകുമ്പോൾ, എന്നെങ്കിലുമത് നിലയ്ക്കുമോന്നറിയാതെ ഞാനൊരു സാലഭഞ്ജികയായി മാറുകയായിരുന്നു.
NB:- ഇഷ്ടായല്ലോ ? അല്ലേ?
.
