അതെങ്ങനെ കണ്ട ആണുങ്ങളെ ഇളക്കം കാണിക്കാൻ പോകല്ലേ… നാണം ഇല്ലാത്തോള്…ഉമ്മയുടെ വാക്കുകൾ കേട്ടപ്പോൾ പുറത്തേക് വെച്ച…….

എഴുത്ത്:- നൗഫു ചാലിയം

“ഇറങ്ങിയല്ലോ… തമ്പുരാട്ടി….

ജോലിക് പോകാൻ നേരം ഓൾക്കൊരു അസുഖവും ഇല്ല…

അതെങ്ങനെ നാലാണുങ്ങളെ ഓളെ ഇളക്കം കാണിക്കാൻ പോവല്ലേ…”

“വീടിന് അടുത്തുള്ള ഒരു ഷോപ്പിൽ ജോലിക് ഇറങ്ങാൻ നേരമായിരുന്നു ഉമ്മയുടെ വായിൽ ഉള്ളതെല്ലാം സെൻസർ കട്ടിങ് പോലും ഇല്ലാതെ കേൾക്കേണ്ടി വന്നത്…”

“ഇന്നലെ പുലർച്ചെ അഞ്ചര ക്ക് തന്നെ എഴുന്നേറ്റ് അടുക്കളയിൽ കയറിയപ്പോൾ പുറത്തുനിന്നുള്ള മഞ്ഞ് വടക്കേരിയയുടെ ഗ്രിൽ വഴി ഉള്ളിലേക്കു കയറിയത് കാരണം മുഖം തലയിൽ ഉണ്ടായിരുന്ന ഷാൾ കൊണ്ട് പൊതിഞ്ഞു പണി എടുത്തെങ്കിലും ഇടക് ശ്വാസം പോലും നേരാവണ്ണം എടുക്കാൻ കഴിയാതെ ബുദ്ധിമുട്ടിയിരുന്നു..

പണി പാളുമെന്ന് അറിയാമായിരുന്നെങ്കിലും വൈകുന്നേരത്തിന് മുമ്പ് ജലദോഷം പോലെ വന്നു…ശരീരം മൊത്തത്തിൽ ക്ഷീണിപ്പിക്കുമെന്ന് കരുതിയില്ല…”

“ഷോപ്പിൽ നിന്നും വരുമ്പോൾ നല്ല രണ്ടു സ്ട്രോങ്ങ്‌ ഗുളികയും വാങ്ങിയായിരുന്നു വീട്ടിലേക് വന്നത്..

രാത്രി ഭക്ഷണം കഴിച്ചു ഗുളിക കഴിച്ചു കിടന്നതും ഫോൺ പോലും നോക്കാൻ കഴിയാതെ ഉറക്കം പിടി മുറുക്കി.. പത്തു മണിക്ക് ഇക്ക കയറി വന്നതോ ഭക്ഷണം കഴിച്ചതോ ഒന്നും തന്നെ ഞാൻ അറിഞ്ഞിരുന്നില്ല എന്നതായിരുന്നു സത്യം…

മൊത്തത്തിൽ ഒരു ക ഞ്ചാവ് അടിച്ച ഫീൽ… ( ഇയ്യതിനു ക ഞ്ചാവ് അടിച്ചു നോക്കീനോ എന്ന് ചോദിക്കണ്ട… ഒരു ഫീൽ കിട്ടാൻ പറഞ്ഞതാണ് 😁)”

“സാധാരണ ഒന്നോ രണ്ടോ വട്ടം ബാത്‌റൂമിൽ പോകാൻ എഴുന്നേൽക്കുന്ന ഞാൻ അഞ്ചര ആയപ്പോൾ അലാറം പോലും കേൾക്കാത്തത് കൊണ്ട് ഇക്ക ഉരുട്ടി ഉരുട്ടി യായിരുന്നു എന്നെ എഴുന്നേൽപ്പിച്ചത്…

ഗുളിക യുടെ കിക്ക് പോകാത്തത് കൊണ്ടോ എന്തോ കുറച്ചു നേരം ബെഡിൽ തന്നെ കാൽ നിലത്തേക് ഇട്ട് ഞാൻ ഇരുന്നു…”

“മോന്ക് മദ്രസയിൽ പോകാൻ ഉള്ളത് കൊണ്ട് തന്നെ അവനെ പറഞ്ഞയക്കണമല്ലോ എന്ന് കരുതി അടുക്കളയിൽ കയറിയപ്പോൾ ആയിരുന്നു തല കറങ്ങുന്നത് പോലെ തോന്നി വീണ്ടും റൂമിലേക്കു തന്നെ വന്നത്..

ഒരു പത്തു മിനിറ്റ് കിടന്നാൽ ശരിയാകുമെന്ന് കരുതി വീണ്ടും കിടന്നു..

പത്തോ പതിനഞ്ചോ മിനിറ്റ് കഴിഞ്ഞപ്പോൾ വീണ്ടും എഴുന്നേറ്റു അടുക്കളയിലേക്ക്..”

“ഇല്ല… പിന്നെയും തലക് ഉള്ളിൽ പുകച്ചിലോ ഉറക്കം വരവോ..

സഹിക്കാൻ കഴിയാതെ അടുപ്പത്തു വെച്ച ദോശ ചട്ടി ഓഫ് ആക്കിയിരിക്കുന്നോ എന്ന് പോലും നോക്കാതെ വീണ്ടും ബെഡിലേക് വീണു..”

“ആ ഉറക്കം പിന്നെ എഴുന്നേൽക്കുന്നത് അടുക്കളയിലെ പാത്രങ്ങളുടെ ശബ്ദം കൂടിയപ്പോൾ ആയിരുന്നു…

ഉമ്മ അടുക്കളയിൽ കയറി എന്നോടുള്ള ദേഷ്യം തീർക്കുകയാണ്..”

“സമയം ഒമ്പത് മണി ആയിട്ടുണ്ട്..

ഷോപ്പിൽ ഒമ്പതരക്ക് മുമ്പ് പോകേണ്ടത് കൊണ്ട് തന്നെ വേഗം ഒരുങ്ങി ഇറങ്ങി..

മോനും മോളും കളിച്ചു ഇരിക്കുന്നത് കണ്ടപ്പോൾ ഞാൻ അവനോട് ചോദിച്ചു നീ ഇന്ന് മദ്രസയിൽ പോയില്ലേ ടാ ന്ന്..

അവന്റെ മറുപടി ആയിരുന്നു എന്നെ ഞെട്ടിച്ചത്..

ഇന്ന് വെള്ളിയാഴ്ച അല്ലെ ഉമ്മാ.. ഇന്ന് മദ്രസ ലീവ് ആണല്ലോ എന്ന്..

ശ്ശോ വെറുതെ അഞ്ചരക്ക് തന്നെ എഴുന്നേറ്റു.. “

ഒരു ഗ്ലാസ് ചായകുടിച്ചു വീട്ടിൽ നിന്നും ഇറങ്ങാൻ നേരം ആയിരുന്നു ഉമ്മ നേരത്തെ പറഞ്ഞത് ഞാൻ കേൾക്കുന്നത്..

“ഒരു മ്പ ട്ടോള്..

ഇറങ്ങിയല്ലോ കറക്റ്റ് സമയത്ത് തന്നെ..

ഇപ്പൊ ഓൾക് യാതൊരു അസുഖവും ഇല്ല…

അതെങ്ങനെ കണ്ട ആണുങ്ങളെ ഇളക്കം കാണിക്കാൻ പോകല്ലേ… നാണം ഇല്ലാത്തോള്…”

“ഉമ്മയുടെ വാക്കുകൾ കേട്ടപ്പോൾ പുറത്തേക് വെച്ച കാലുകൾ ഞാൻ തിരികെ വെച്ചു..

അടുക്കളയിലേക്ക് കയറി…”

“മുഖം മുഴുവൻ പുച്ഛം നിറച്ചു എന്നെ തന്നെ നോക്കുന്നുണ്ട് ഉമ്മ..

ഇടക് വല്ലപ്പോഴും ഉമ്മ ഇങ്ങനെ വായ തുറക്കാറുണ്ടെങ്കിലും ഇന്നെന്തോ തലയുടെ പെരുപ്പും ദേഷ്യവും കാരണം എന്തേലും പറയാതെ പോകാൻ കഴിയില്ല എന്ന് തോന്നി..

ഉമ്മാ… തല ഒന്ന് കറങ്ങി.. ഇന്നലെ രാവിലെ മഞ്ഞ് കൊണ്ടത് കൊണ്ടാണെന്നു തോന്നുന്നു അലർജി കയറി ശരീരം മൊത്തത്തിൽ ക്ഷീണിക്കുകയും ചെയ്തു…

ഗുളിക യുടെ ആഫ്റ്റർ എഫക്ട് കാരണം കുറച്ചു നേരം ഞാൻ കിടന്നു എന്നത് സത്യമാണ്…അതിന് ഞാൻ അടുക്കളയിൽ കയറാത്ത ഏതേലും ദിവസം ഒന്ന് കയറി എന്തേലും വെച്ചു ഉണ്ടാകുന്നതിനു വായിൽ തോന്നുന്നത് വിളിച്ചു പറഞ്ഞാൽ എന്റെ സ്വഭാവം മാറും…

ഞാൻ കേട്ടു നിന്നെന്നു വരൂല..

നിങ്ങളും ഞാനും ഈ വീട്ടിൽ ആണ് താമസിക്കുന്നത്…ഈ വീട് നിങ്ങളുടെ മകന്റെ പേരിൽ ആയത് പോലെ തന്നെ എന്റെ പേരിലും ആണ്…

മനസിലായില്ലേൽ പറയാം രണ്ടാളുടെയും പേരിലാണ് ആധാരം ഉള്ളത്…രണ്ടാൾക്കും തുല്യ അവകാശം…

ഇനി ഉമ്മാക് ഇവിടെ നിൽക്കുന്നതിൽ ബുദ്ധിമുട്ട് ആണേൽ വേറെയും മക്കൾ ഉണ്ടല്ലോ അങ്ങോട്ട്‌ പോകാം…

ഇറങ്ങി പോകാൻ ഞാൻ പറയില്ല…

ഞാൻ ഇറക്കി വിട്ടെന്ന് നിങ്ങളും പറയരുത്..

ഉമ്മയുടെ മുന്നിൽ കൈ കൂപ്പി നിന്ന പോലെ പറഞ്ഞപ്പോൾ ഉമ്മാക് ആകെ അയ്യടാ എന്ന പോലെയായി…”

“ഞാൻ പറഞ്ഞത് മനസിലായല്ലോ…അല്ലാതെ എന്നെ പ്രാകി… എന്നെ ചീത്തയും പറഞ്ഞ് ഞാൻ കൊണ്ട് വരുന്നത്… ഞാൻ ജോലി ചെയ്തു കൊണ്ടു വരുന്നത് ഒരു ഉളുപ്പും ഇല്ലാണ്ട് കഴിച്ചു ജീവിച്ചാൽ അതൊക്കെ കാണാൻ എനിക്ക് ഇത്തിരി ബുദ്ധിമുട്ട് ഉണ്ട്…

ഇനി വല്ലപ്പോഴും….

എനിക്ക് കയറാൻ പറ്റാത്ത സമയത്ത് മാത്രം ഒന്ന് അടുക്കളയിൽ കയറി സഹായിച്ചു മിണ്ടാതെ നിൽക്കാമെങ്കിൽ ഇവിടെ നിൽക്കാം എനിക്കൊരു പ്രശ്നവും ഇല്ല..

ഇനി ഇത് മകനോട് പറഞ്ഞു കൊടുത്തു ഞങ്ങളെ തമ്മിൽ തെറ്റിക്കാൻ നോക്കിയാൽ സത്യമായിട്ടും ഇങ്ങള് എനിക്ക് ഉമ്മയാണെന്ന് ഞാൻ മറക്കും..

അല്ല പിന്നെ സഹിക്കുന്നതിനും ഇല്ലേ ഒരു പരിധി “

ബൈ

♥️