മുൻ ഭാഗം വായിക്കാൻ ഇവിടെ ക്ലിക്ക് ചെയ്യൂ
ശംഭുവേട്ടാ … ആ കുട്ടികൾ ഏത്അ.നാഥാലയത്തിലാ…..രഞ്ജു ചോദിച്ചു.
അവരെ കൊണ്ടുപോയിടത്തൊക്കെ അന്വേഷിച്ചതാ… പക്ഷെ ആകുട്ടികൾ അവിടെയില്ല. അവര് മതം മാറി സിസ്റ്റർമാരായി ഏതോ മഠത്തിലുണ്ട് എന്നാണ് ഞാൻ അറിഞ്ഞത്.ശംഭു പറഞ്ഞു.
അന്വേഷിക്കാം എവിടെ ആണെങ്കിലും കണ്ടുപിടുക്കാം..നരേൻ പറഞ്ഞു.
ഇനിമുതൽ ശംഭു ഒറ്റയ്ക്കല്ലല്ലോ നമ്മൾ എല്ലാവരും കൂടി കണ്ടുപിടിക്കും…. ശംഭുവിന്റെ ആത്മവിശ്വാസം ഇരട്ടിച്ചു….
എന്റെ അമ്മയുടെ കഥ കേട്ടിട്ട് നിങ്ങൾക്ക് എല്ലാം എന്താ തോന്നിയത്? ഇപ്പോൾ എന്റെ അമ്മയ്ക്ക് പൈസയുടെ ഒരഹങ്കാരവും ഇല്ലാട്ടോ…. എല്ലാവരോടും സ്നേഹം മാത്രം.നരേൻ ചിരിച്ച് കൊണ്ട് പറഞ്ഞു.
സത്യം പറഞ്ഞാൽ നന്ദി പറയേണ്ടത് ശംഭുവിനോടാ…..എന്റെ അമ്മയുടെ കണ്ണ് തുറപ്പിച്ചതിന്…..
നരേൻ നന്ദിയോടെ ശംഭുവിനെ നോക്കി.
നമുക്കിടയിൽ എന്തിനാടോ ഒരു നന്ദി പറച്ചിൽ…. ശംഭു നരേന്റെ തോളിൽ തട്ടി.
മോനേ അഞ്ജുമോളെ ഇങ്ങോട്ട് വിളിച്ചു കൊണ്ട് വാ. അവൾ ഇതുവരെ മുറിയിൽ നിന്ന് ഇറങ്ങിയില്ലല്ലോ….നരേനോട് ഗിരിജ പറഞ്ഞു.
അവൾ ഫോണിലാണെന്നു തോന്നുന്നു.സംസാരിക്കുന്ന ശബ്ദം കേൾക്കുന്നുണ്ട്.
സംസാരിച്ചു കഴിയുമ്പോൾ വന്നോളും…. നരേൻ താല്പര്യം ഇല്ലാത്തത് പോലെ പറഞ്ഞു.
കുറച്ച് കഴിഞ്ഞപ്പോഴേയ്ക്കും അഞ്ജു ഇറങ്ങി വന്നു.
ഈ വീട് കച്ചവടമായിട്ടുണ്ട്..ഒരുകോടി മുപ്പത് ലക്ഷത്തിന്…….അവര് തൊട്ടടുത്ത ദിവസം തന്നെ ആധാരം.എഴുതാമെന്നാ പറഞ്ഞത്..അതുകൊണ്ട് എത്രയും പെട്ടെന്ന് ഇവിടെ നിന്നും മാറിക്കൊടുക്കേണ്ടി വരും.
എടി…… എന്റെ അമ്മയുടെ ജീവിതം അറിഞ്ഞിട്ടും നിനക്ക് ഒരു മാറ്റവുമില്ലേ….. അഹങ്കാരം തലയ്ക്ക് പിടിച്ചിരിക്കുവാ നിനക്ക്. ഇത് നിന്റെ നാശത്തിലേയ്ക്കാ… നോക്കിക്കോ….
ഈ പാവം അച്ഛനും അമ്മയും എങ്ങോട്ട് പോകുമെടി…?
നീ അവരെ തിരിച്ച് വിളിച്ച് ഈ വീട് വിൽക്കുന്നില്ലെന്ന് പറയെടി….
നരേൻ ആജ്ഞാപിച്ചു.
ആരൊക്കെ എന്തൊക്കെ പറഞ്ഞാലും ഞാൻ ഈ വീട് വിൽക്കും….. അച്ഛനും അമ്മയും എന്റേത് മാത്രമാണോ….?.അല്ലല്ലോ…. ദേ ഈ നിൽക്കുന്നവൾ ഉണ്ടല്ലോ എപ്പോഴും രക്ഷകയായിട്ട്…..ബാക്കി അവൾ നോക്കിക്കോളും.
നിർത്തടി….. ശിവരാമൻ ചാടി എഴുന്നേറ്റു.
ഞാനും എന്റെ ഭാര്യയും എന്ത് ചെയ്യണമെന്നും എവിടെ ജീവിക്കണമെന്നും നീയല്ല തീരുമാനിക്കുന്നത്.
എനിക്കറിയാടി എന്ത് ചെയ്യണമെന്ന്….നിങ്ങൾക്കാർക്കും ഞാനോ എന്റെ ഭാര്യയോ ഒരു ഭാരമാവില്ല…അതോർത്ത് ആരും പേടിക്കണ്ട…..
അച്ഛാ….. എനിക്ക് അച്ഛനും അമ്മയും ഒരിക്കലും ഒരു ഭാരമാകില്ല.നിങ്ങൾ രണ്ടുപേരും ഞങ്ങളുടെ കൂടെ വരണം…. രഞ്ജു കരഞ്ഞുകൊണ്ട് ശംഭുവിന്റെ അടുത്ത് ചെന്നു.
ശംഭുവേട്ടാ അമ്മയോടും അച്ഛനോടും നമ്മുടെ കൂടെ പോരാൻ പറയ്….. ശംഭുവേട്ടൻ വിളിച്ചാൽ അവര് രണ്ട് പേരും നമ്മളുടെ കൂടെ വരും. എനിക്കുറപ്പാ….
രഞ്ജു നമ്മൾ പോകുമ്പോൾ ഇവര് രണ്ട് പേരും നമ്മുടെകൂടെ കാണും…. എന്താ അത് പോരെ…. ആദ്യം വീട് വിൽപ്പന നടക്കട്ടെ….. ശംഭു രഞ്ജുവിനെ സമാധാനിപ്പിച്ചു.
ആരും ഇനി വിഷമിച്ചിരിക്കണ്ട… നല്ലൊരു ദിവസമായിട്ട് എല്ലാവരും കൂടി അടിച്ചു പൊളിക്കാൻ വന്നതല്ലേ?….. നമുക്ക് ഒന്ന് പുറത്തേയ്ക്ക് പോയാലോ….?
ഭക്ഷണം കഴിച്ചിട്ട് മതി….. എന്തുപറയുന്നു എല്ലാവരും…? ശംഭു ചോദിച്ചു.
മക്കളേ നിങ്ങൾ പോയിട്ട് വാ… ഞങ്ങൾ വരുന്നില്ല…. ശിവരാമൻ പറഞ്ഞു.
അത് പറ്റില്ല അച്ഛാ…. പോകുവാണെങ്കിൽ നമ്മൾ എല്ലാവരും ഒരുമിച്ചേ പോകൂ…….
അഞ്ജു ഉൾപ്പെടെ എല്ലാവരും പോകാമെന്ന് സമ്മതിച്ചു.
പെട്ടെന്ന് തന്നെ എല്ലാവരും ഭക്ഷണം കഴിച്ച് റെഡിയായി പുറത്തേക്കിറങ്ങി.
വണ്ടി ചെന്ന് നിന്നത് ഒരു പള്ളിമുറ്റത്തായിരുന്നു..അയ്യോ.. ഇതെന്താ കറങ്ങാൻ പോകുവാണെന്ന് പറഞ്ഞിട്ട് പള്ളിയിൽ…..രഞ്ജു ശംഭുവിനോട് ചോദിച്ചു.
കറങ്ങാൻ തന്നെയാ പോകുന്നത്.എനിക്ക് ഇവിടെ കയറേണ്ട ഒരു കാര്യമുണ്ട്. നിങ്ങൾ ഇവിടെ ഇരുന്നോ ഞാൻ ഇപ്പോൾ തന്നെ വരാം..
ശംഭു പള്ളിയുടെ പടവുകൾ കയറിപ്പോകുന്നത് നോക്കി രഞ്ജു കാറിൽ തന്നെ ഇരുന്നു.
അമ്മേ ഈ ശംഭുവേട്ടൻ എന്തിനാവും പള്ളിയിലേക്ക് പോയത്? ഒരെത്തും പിടിയും കിട്ടുന്നില്ലല്ലോ……
നരേൻ അവന്റെ കാർ തുറന്ന് പുറത്തിറങ്ങി. രഞ്ജുവിന്റെ കാറിന്റെ അരികിൽ വന്നു…ഗ്ലാസിൽ പതിയെ തട്ടി.
രഞ്ജു ഡോർ തുറന്ന് പുറത്തിറങ്ങി.
എന്താ നരേട്ടാ…
ശംഭു എന്തിനാ രഞ്ജു അങ്ങോട്ട് പോയത്…..?.നരേൻ ചോദിച്ചു.
എനിക്കറിയില്ല നരേട്ടാ…. എന്താ കാര്യമെന്ന്… ഞങ്ങളോട് ഇവിടെ ഇരിക്കാനാ പറഞ്ഞത്….
എന്തോ കാര്യമുണ്ട്…. അതുറപ്പാ…..
നരേൻ സ്വയം പറഞ്ഞു….
അര മണിക്കൂർ കഴിഞ്ഞപ്പോഴേക്കും ശംഭു പള്ളിയിൽ നിന്നിറങ്ങി വന്നു. അങ്ങോട്ട് പോയതിലും സന്തോഷവാനായിരുന്നു അവൻ…
എന്താ ശംഭുവേട്ടാ അങ്ങോട്ട് പോയതുപോലെ അല്ലല്ലോ നല്ല സന്തോഷത്തിലാണല്ലോ….. എന്താ കാര്യം? രഞ്ജു ചോദിച്ചു.
നരേനും രഞ്ജുവിന്റെ ചോദ്യത്തിന് ശരി വച്ചു.
നമ്മുടെ റൂട്ട് ക്ലിയർ ആകുന്നുണ്ടെടോ…. നരേനെ നോക്കി ശംഭു പറഞ്ഞു..
ആണോ…. അവരെവിടെ ആടോ ഉള്ളത്….? നരേൻ ആകാംക്ഷയോടെ ചോദിച്ചു.
വെപ്രാളപ്പെടാതെടോ…… ഇപ്പോൾ എനിക്കൊന്നും പറയാൻ പറ്റില്ല. പക്ഷെ അധികം താമസിക്കാതെ തന്റെ മുറപ്പെണ്ണുങ്ങൾ നമുക്ക് മുൻപിൽ എത്തും…. ഇപ്പോൾ താൻ പോയി വണ്ടിയിൽ കയറ്… ഇന്നത്തെ ട്രിപ്പിന് കുറച്ചുകൂടി എനർജി ആകാം…കാറിൽ കയറുമ്പോൾ ശംഭു ചിരിച്ചുകൊണ്ട് പറഞ്ഞു…..
എല്ലാവരെയും ആകാംഷയുടെ മുൾമുനയിൽ നിർത്തിയിട്ട് ഒരു കള്ളച്ചിരിയുമായി ശംഭു എല്ലാവരുടെയും കൂടെ യാത്ര തുടർന്നു……
തുടരും......
