മുൻ ഭാഗം വായിക്കാൻ ഇവിടെ ക്ലിക്ക് ചെയ്യൂ
ശംഭൂ…… മോനേ ഇന്ന് സമയമുണ്ടെങ്കിൽ മോൻ രഞ്ജുവിനെയും കൂട്ടി അച്ഛന്റെ വീട്ടിലും അമ്മയുടെ വീട്ടിലും ഒക്കെ വിരുന്നിനു പോ…അവരെല്ലാം നിങ്ങളെ ക്ഷണിച്ചിട്ടല്ലേ പോയത്..?
രഞ്ജുവിന്റെ അമ്മയുടെയും അച്ഛന്റെയും വീട്ടിൽ നിങ്ങൾ നാലു ദിവസം അവിടെ നിൽക്കുമ്പോൾ പോകാം. ഇന്ന് തന്നെ ഓരോ സ്ഥലത്തും പൊയ്ക്കോ മക്കളേ…..ആ ചടങ്ങ് അങ്ങ് തീരുമല്ലോ… മാലതി തന്റെ അഭിപ്രായം പറഞ്ഞു.
ഞാനും അതോർത്തായിരുന്നു. എന്തൊക്കെ ചടങ്ങുകളാ…. ഒരിടത്ത് ചെന്നിട്ട് മറ്റൊരിടത്ത് ചെന്നില്ലെങ്കിൽ പിന്നെ അത് മതി അടുത്ത പ്രശ്നത്തിന്.
അവളുടെ പണി എല്ലാം തീരട്ടെ എന്നിട്ട് ഇറങ്ങാം.എവിടെയും പോകാൻ തീരെ താല്പര്യം ഇല്ലാത്ത രീതിയിലാണ് ശംഭു പറഞ്ഞത്.
എന്റെ ശംഭൂ ഇവിടുത്തെ പണിയൊക്കെ ഇപ്പോൾ ദൈവം സഹായിച്ച് എനിക്ക് ചെയ്യാവുന്നതേ ഉളളൂ… നീ അവളെയും കൂട്ടി വേഗം പോകാൻ നോക്ക്.
രഞ്ജൂ… മോളേ.. ദേ അവൻ നിന്നെ വിളിക്കുന്നുണ്ട്. നീ വേഗം റെഡി ആയി അവന്റെ കൂടെ പറ്റുന്നിടത്തോളം വീട്ടിൽ വിരുന്നിന് പോയിട്ട് വാ….
ശരി അമ്മേ… കുറച്ചു പണിയും കൂടിയേ ഉളളൂ. അത് ഞാൻ പെട്ടെന്ന് തീർത്തിട്ട് പോകാം.
എന്റെ രഞ്ജൂ നീ പെട്ടെന്ന് റെഡിയായി പോകാൻ നോക്ക്. ബാക്കി പണിയൊക്കെ ഞാൻ ചെയ്തോളാം.
രഞ്ജു പെട്ടെന്ന് തന്നെ റെഡി ആയി..പൊൻമാൻ നീല സാരി ആയിരുന്നു അവളുടെ വേഷം. അവളുടെ സാരിയോട് ചേരുന്ന ഷർട്ട് ആയിരുന്നു ശംഭുവും ഇട്ടിരുന്നത്. രണ്ടുപേരും മാലതിയോടും ദിവാകരനോടും യാത്ര പറഞ്ഞ് വീട്ടിൽനിന്നിറങ്ങി.അവർ പോകുന്നതും നോക്കി മാലതി നിന്നു.
*****************
മോനേ…. എടാ…. മഹാലക്ഷ്മി അമ്മ ഉറക്കെ വിളിച്ചു.
എന്താ ലക്ഷ്മി.. എന്തൊരു ശബ്ദമാ ഇത്?നിനക്ക് കുറച്ചു പതുക്കെ വിളിച്ചുകൂടെ….ശങ്കർദാസ് ദേഷ്യത്തോടെ ചോദിച്ചു.
എന്റെ ഏട്ടാ….. അവർക്ക് വിരുന്നിനൊന്നും പോകണ്ടേ?അവളിന്ന് ഈ നേരം വരെ അടുക്കളയിലേയ്ക്ക് വന്നില്ല.ഇവളെ കെട്ടിക്കൊണ്ട് വന്നത് ഇങ്ങനെ മുറിക്കകത്ത് തന്നെ ഇരിക്കാനാണോ?
എല്ലാവരും എന്നോടാ ചോദിക്കുന്നത്. ഞാൻ ഇവരോടൊക്കെ എന്ത് സമാധാനം പറയും? മഹാലക്ഷ്മി അമ്മ തന്റെ ദയനീയ അവസ്ഥ ശങ്കർ ദാസിനോട് പറഞ്ഞു.
ലക്ഷ്മി നരേനും അഞ്ജുവും കൊച്ചു കുട്ടികൾ ഒന്നുമല്ല. അവർ അവർ ക്കിഷ്ടമുള്ള രീതിയിൽ മുൻപോട്ട് പോകട്ടെ. നമ്മളായിട്ട് ഒരക്ഷരം അനാവശ്യ മായിട്ട് അവരോട് ചോദിക്കരുത്.
അച്ഛാ…. നരേൻ നിറകണ്ണുകളോടെ അയാളെ വിളിച്ചു. എന്റെ വിവാഹം ഒരു വല്ല്യ തെറ്റായിരുന്നു. ഒന്നും വേണ്ടായിരുന്നു.
മോനേ ഒരു കുടുംബജീവിതമാകുമ്പോൾ ഒരുപാട് കാര്യങ്ങൾ നമ്മൾ മനസ്സിലാക്കണം. എന്തിനും ഏതിനും കുറ്റം കണ്ടു പിടിക്കുന്നതിലല്ല നമ്മൾ മിടുക്ക് കാട്ടേണ്ടത് മറിച്ച് അവരെ കൂടി നല്ല രീതിയിലേയ്ക്ക് മാറ്റി എടുക്കാൻ നമുക്ക് കഴിയണം. അതിന് ആദ്യം നീ ചെയ്യേണ്ടത് അവളിലെ നന്മകളെ കണ്ടെത്തുക എന്നതാണ്.
നരേൻ നീതന്നെ ഒന്നാലോചിച്ച് നോക്ക് കല്ല്യാണം കഴിഞ്ഞ് രണ്ട് ദിവസത്തിനുള്ളിൽ ജീവിതം മടുത്തു എന്ന് പറഞ്ഞാൽ….എന്താടാ കല്ല്യാണം എന്ന് പറയുന്നത് ഒരു കുട്ടികളിയാണോ?രണ്ട് ദിവസം കൊണ്ട് എന്റെ മോൻ എന്താ ജീവിതത്തെ കുറിച്ച് പഠിച്ചത്?
മോനെ നീ സ്നേഹത്തോടെ അവളെയും കൂട്ടി ഒന്ന് പുറത്ത് പോ…..
അച്ഛാ…. ഇന്നുവരെ ഞാൻ അച്ഛനെയും അമ്മയെയും അനുസരിച്ചിട്ടേ ഉളളൂ…ഇനി അങ്ങോട്ടും അങ്ങനെ തന്നെ ആയിരിക്കും…
എനിക്ക് ഒരു സംശയമേ ഉളളൂ ആ പാവം അച്ഛനും അമ്മയും ആ വീട്ടിൽ നിന്ന് ഇറങ്ങി പോകണമെന്ന് ഇവൾ പറഞ്ഞെങ്കിൽ ഇവളുടെ മനസ്സ് എത്ര ക്രൂരമാണ്.എനിക്ക് അതിനെ ഉൾക്കൊള്ളാൻ പറ്റുന്നില്ല.
എന്നെ ഉൾക്കൊള്ളണമെന്ന് ഞാൻ ആരോടും ആവശ്യപ്പെട്ടില്ല..പ്രതീക്ഷിക്കാതെ അഞ്ജുവിന്റെ ശബ്ദം കേട്ടപ്പോൾ നരേൻ ഞെട്ടി തിരിഞ്ഞ് അവളെ നോക്കി
മോളേ അഞ്ജൂ…..ആദ്യം തന്നെ മോളുടെ ദേഷ്യം കളയണം. എല്ലാവരും കൂടി സന്തോഷമായിട്ട് ജീവിക്കുകയല്ലേ വേണ്ടത്?
മോളിങ്ങോട്ട് വന്നേ… എന്താ മോളുടെ യഥാർത്ഥ പ്രശ്നം? പ്രശ്നം എന്താണെങ്കിലും അതിന് ഒരു പരിഹാരവും ഉണ്ടാകും.ശങ്കർദാസ് അവളെ നിർബന്ധപൂർവം കസേരയിലിരുത്തി.
ആവീട് എന്റെ അദ്വാനമാണ്. എന്റെ അച്ഛൻ എല്ലാം നശിപ്പിച്ചിട്ടേ ഉളളൂ. പണമില്ലാത്തതിന്റെ പേരിൽ ഞങ്ങൾ ഒരുപാട് നാണംകെട്ടിട്ടുണ്ട്. അച്ഛന്റെ ബന്ധുക്കൾ… അമ്മയുടെ ബന്ധുക്കൾ.. അവരെല്ലാം ഞങ്ങളെ പുച്ഛത്തോടെയെ നോക്കിയിട്ടുള്ളൂ. പണമുള്ളവന് മാത്രമേ ഈ ലോകത്ത് വിലയുള്ളൂ. പണമുണ്ടെങ്കിൽ നമുക്ക് ബന്ധുക്കളും കൂട്ടുകാരും ഉണ്ടാവും. അതില്ലാത്തവനെ തിരിഞ്ഞു നോക്കാൻ ആരും കാണില്ല..അത് മനസ്സിലായപ്പോൾ മുതൽ എനിക്ക് വാശി ആയിരുന്നു. അങ്ങനെ ഞാൻ പഠിച്ചു ജോലികിട്ടി കടങ്ങൾ വീട്ടി. നല്ല ഒരു വീട് വച്ചു. ഇപ്പോൾ പണ്ടെന്നെ അറിയാത്ത ബന്ധുക്കൾക്ക് എന്നെ അറിയാം.കൂട്ടുകാരൊക്കെ നമ്പർ തപ്പി എടുത്ത് വിളിക്കാൻ തുടങ്ങി. കാരണമെന്താ പണം… അതെന്റെ കയ്യിലുണ്ട്.
ഞാൻ എന്റെ വീട് വാടകയ്ക്ക് കൊടുക്കാൻ പോകുവാണെന്ന് പറഞ്ഞതിന് ഒറ്റക്കാരണമേ ഉളളൂ. എല്ലാ മാസവും എന്റെ ആവശ്യത്തിനുള്ള പൈസ എനിക്ക് വേണം. ആരുടേയും മുൻപിൽ കൈ നീട്ടാൻ എനിക്ക് വയ്യ. അതുകൊണ്ട് അച്ഛനാണെങ്കിലും അമ്മയാണെങ്കിലും എന്റെ പേരിലുള്ള ആ വീട്ടിൽ താമസിച്ചാൽ എനിക്ക് വാടക തന്നേ പറ്റൂ..
അതിന് നീ ജോലി ചെയ്യുമ്പോൾ നിനക്ക് കിട്ടുന്നത് പൈസ അല്ലേ? പിന്നെന്തിനാ സ്വന്തം അച്ഛനെയും അമ്മയെയും നീ ഇങ്ങനെ കൊ ല്ലാകൊ ല ചെയ്യുന്നത്?നരേൻ സഹികെട്ട് ചോദിച്ചു.
നരേട്ടാ… ഞാൻ എന്റെ ജോലി റിസൈൻ ചെയ്തിട്ടാ ഇവിടെ വന്നത്. ഞാൻ ഇനി എങ്ങോട്ടും പോകുന്നില്ല. എനിക്ക് ജീവിക്കാനുള്ളത് ഞാൻ കണ്ടുവച്ചിട്ടുണ്ട്.
അഞ്ജുവിന്റെ സംസാരം കേട്ടപ്പോൾ അവളുടെ കരണത്തിനിട്ട് ഒന്ന് പൊട്ടിക്കാനാ നരേന് തോന്നിയത്. അവൻ പല്ലുകൾ ഞെരിച്ച്അ.ക്ഷമയോടെ എല്ലാം കേട്ടിരുന്നു.
പൈസയ്ക്ക് ജീവിതത്തിൽ സ്ഥാനമുണ്ട് പക്ഷെ അതിനുമപ്പുറം സ്ഥാനമുണ്ട് നല്ല ബന്ധങ്ങൾക്ക്…
മോളുടെ ഈ അമ്മ ഇങ്ങനെ ആയിരുന്നോ നേരത്തെ? മഹാലക്ഷ്മി അമ്മയെ ചൂണ്ടി ശങ്കർദാസ് ചോദിച്ചു.
മഹാലക്ഷ്മി അമ്മ എന്ന ഇവൾ … ഒരു നല്ല മനുഷ്യ സ്നേഹിയായത് ഈ അടുത്ത കാലത്താണ്. അതുവരെ ഇവൾക്കും പണത്തിന്റെ അഹങ്കാരമായിരുന്നു.ചുറ്റിനും വേലക്കാർ…. സ്നേഹത്തോടെ ഒരു നേരം പോലും എന്റെ ഭാര്യ ഇവിടെ ഭക്ഷണം വിളമ്പിയിട്ടില്ല. ചില തിരിച്ചറിവുകൾ അവളെ പാടെ മാറ്റി. ഇപ്പോൾ അവളുടെ ലോകം അടുക്കളയായി… സ്നേഹത്തോടെ ഭക്ഷണം വിളമ്പി തരുന്ന സ്നേഹനിധിയായ അമ്മയും ഭാര്യയുമായി.
ഇവൾക്കുണ്ടായ ഈ മാറ്റം ഇപ്പോൾ അഞ്ജു മോൾക്കും ആവശ്യമാണ്. അതിന് ആദ്യം മോള് ഈ ദേഷ്യമൊക്കെ കളഞ്ഞ് നിന്റെ ഈ അമ്മയോട് തന്നെ ചോദിക്ക്….എങ്ങനെയാണ് “എന്തിനും പണം ആണ് മുഖ്യം” എന്ന ചിന്തയിൽ നിന്ന്…. ബന്ധങ്ങൾ കഴിഞ്ഞിട്ടേ പണത്തിനു സ്ഥാനമുള്ളൂ എന്ന ചിന്തയിലേയ്ക്ക് വന്നതെന്ന്… എന്നിട്ട് എല്ലാവരെയും സ്നേഹിക്കുന്ന നല്ല ഒരു ഭാര്യയും മകളും ചേച്ചിയുമൊക്കെ ആകാൻ നോക്ക്.
ഇപ്പോൾ ഞാൻ പറഞ്ഞത് മര്യാദയുടെ ഭാഷ…. ഈ ശബ്ദത്തിനും ഭാഷയ്ക്കും കാഠിന്യം വന്നാൽ അത് അത്ര സുഖകരമാവില്ല മോളേ….. ശങ്കർദാസിന്റെ ആ വാക്കുകൾ അഞ്ജുവിനുള്ള സ്നേഹ.ശാസനമായിരുന്നു ……
തുടരും……
