സ്വപ്നാടനം
എഴുത്ത്:-സെബിൻ ബോസ്
” അപ്പൊ കാര്യങ്ങളെങ്ങനെയാ ? ” കൂട്ടത്തിൽ പ്രായമേറെയുള്ള, അമ്മാവനാണ് എന്ന് പരിചയപ്പെടുത്തിയ ആളാണ് ചോദിച്ചത്
”അതിപ്പൊ പറയാനെന്തിരിക്കുന്നു ? ചെറുക്കനും പെണ്ണിനുമിഷ്ടപ്പെട്ട നിലയ്ക്ക് പറ്റുന്ന തീയതി നോക്കുക ”
”അതല്ല … കാശിന്റെ കാര്യങ്ങൾ ?”’ അമ്മാവൻ കസേരയുടെ വക്കിലേക്കിരുന്നുകൊണ്ടു സ്വകാര്യമെന്നോണം പറഞ്ഞു .
” ഓ ..കല്യാണത്തിന്റെ ഡ്രെസ്സിനും ആഹാരത്തിനുമൊക്കെയുള്ളത് ഞാൻ കരുതീട്ടുണ്ടന്നെ ”
” എടൊ ..അതല്ല … എന്നാ കൊടുക്കുമെന്ന് … എത്ര പവനും പൈസയും ?” അമ്മാവനൽപം ദേഷ്യം വന്നപോലെയാണ് പറഞ്ഞത് .
” എന്ത് കൊടുക്കാൻ … ചെറുക്കനും പെണ്ണും ഇഷ്ടപ്പെട്ട നിലയ്ക്ക് ഇനി അവർക്കൊരു ജീവിതമല്ലേ നമുക്ക് കൊടുക്കാനുള്ളൂ … ”
” കോ,പ്പ് ..എടൊ .. ചെറുക്കന് നല്ലൊരു ജോലിയുണ്ട് ..അങ്ങ് ഓസ്ട്രേലിയായില് ..അവൻ കമ്പ്യൂട്ടർ എക്സ്പേർട്ട് ആണ് . ”
” എന്റെ മോൾക്കും നല്ലൊരു ജോലിയുണ്ട് ..അവൾ കുവൈത്തിൽ നേഴ്സാണ് … അവളുടെ ജോലിയിൽ അവളും എക്സ്പെർട്ടാണ് .. ”
” ഹോ .. ഇയാളെ കൊണ്ട് … ” അമ്മാവൻ തലയിൽ കൈവെച്ചിട്ട് ചെറുക്കനേം ചെറുക്കന്റെ അച്ഛനേം നോക്കി . ഇരുവരും ഒന്നും മിണ്ടുന്നില്ല ..എത്ര തുക ലോട്ടറി അടിക്കുമെന്ന ആകാംഷയോടെ നോക്കി ഇരിക്കുന്നതല്ലാതെ .
ഇത് തന്റെ ഉത്തരവാദിത്വമാണെന്നുള്ള തോന്നലിൽ അമ്മാവൻ വീണ്ടും തിരിഞ്ഞു .
” എടോ.. പെണ്ണിന്റെ പേർക്ക് എത്ര സ്വത്തുണ്ട് ? ”
“ചെറുക്കന്റെ പേർക്ക് എത്ര സ്വത്തുണ്ട്?.”
” ഇവൻ ഓസ്ട്രേലിയായിൽ പോയെപ്പിന്നെ കൂറ്റനൊരു രണ്ടുനില വീട് വെച്ചിട്ടുണ്ട്. ഇപ്പ പിന്നെ ആരാ പറമ്പിലൊക്കെ അധ്വാനിക്കുന്നെ? എന്നാലും അരയക്കേർ സ്ഥലം ഉണ്ട്.അല്ലേലും ഇവിടെന്നാത്തിനാ സ്ഥലം…അവൻ അവിടെ, ഓസ്ട്രേലിയായിലല്ലേ ജീവിക്കേണ്ടത്”
” എനിക്ക് രണ്ട് പെണ്മക്കളാ… എന്റേം ഭാര്യടേം മക്കടേം കൂടെയുള്ള ആകെ സ്വത്താ ഈ അറുപത് സെന്റ്. പിള്ളേർ രണ്ടിനും ജോലിയായി… ഇനി വേണം ചെറിയൊരു വീട് വെക്കാൻ.”
“അത് കൊള്ളാമല്ലോ… അപ്പൊ പെണ്ണിന്റെ കല്യാണം കഴിഞ്ഞാലും ഞങ്ങടെ ചെറുക്കൻ പൈസ ഇങ്ങോട്ട് തരണമെന്ന്”
“നിങ്ങടെ ചെറുക്കന്റെ പൈസയൊന്നും ഞാൻ ചോദിച്ചില്ല”
“അതല്ല…കല്യാണം കഴിഞ്ഞാൽ അവനും മക്കളും അനുഭവിക്കേണ്ട പണം നിങ്ങടെ വീടിന്റെ ലോണടക്കേണ്ടി വരുമല്ലോയെന്ന്?””
“നിങ്ങൾ വീട് വെച്ചത് കയ്യിലുള്ള പണം കൊണ്ടാണോ?”
“ലോണാ…അവന് നല്ല ജോലിയുണ്ടല്ലോ… അതുകൊണ്ട് എത്ര വേണേലും ലോണും കിട്ടും” അമ്മാവൻ ഗമയോടെ പറഞ്ഞപ്പോൾ ചെറുക്കന്റെ അച്ഛൻ അഭിമാനത്തോടെ ഞെളിഞ്ഞിരുന്നു.
“അപ്പൊ ലോണാണ്… കല്യാണം കഴിഞ്ഞാൽ എന്റെ മോൾ ആ ലോണും അടക്കണം അല്ലെ?””
“എഹ്.. അതെന്തിന്… തന്റെ മോൾടെ ശമ്പളം കൊണ്ട് ലോണടക്കണ്ട ഗതികേടൊന്നും എന്റെ മരുമോനില്ല’ അമ്മാവൻ കലിപ്പിലായി.
“ഓഹ്…ഭാഗ്യം.. അവളെ വിദ്യാഭ്യാസ ലോണെടുത്താണെ പഠിപ്പിച്ചത്…അതവൾ അടച്ചോളൂല്ലോ”
“അതെങ്ങനെ ശെരിയാകും? കല്യാണം കഴിഞ്ഞാൽ പെണ്ണിന്റെ വരുമാനം അവൾക്കും അവളുടെ കെട്യോനും മക്കൾക്കുമുള്ളതല്ലേ? അതല്ലേ നാട്ടുനടപ്പ്?”
“അത് ശെരിയാണ്… അപ്പോപ്പിന്നെ പെണ്ണിന് നല്ലൊരു ജോലി ..അത് വഴി ഉണ്ടാകുന്ന വരുമാനം ,കുടുംബഭദ്രത…അതൊക്കെ നോക്കിയാൽ പോരെ…നിങ്ങളീ ചോദിച്ച സ്ത്രീധനോം പൊന്നും ഭൂ സ്വത്തുമൊക്കെ മേടിക്കണ്ട കാര്യമുണ്ടോ? “
“താനെന്താണീ പറയുന്നത്? ഇയാളീ ലോകത്തെങ്ങുമല്ലേ ജീവിക്കുന്നത്? കെട്ടും കഴിഞ്ഞ് കാലാകാലത്തോളം പെണ്ണ് ചെക്കന്റെ വീട്ടിലല്ലേ ജീവിക്കേണ്ടത്? വെറുതേ ഏതേലും ഒരു പെണ്ണിനും പെണ്ണിന്റെ മക്കൾക്കും തീറ്റെം ചെലവും കൊടുക്കാൻ എന്നാ വട്ടുണ്ടോ?.”
” എന്നാലൊരു കാര്യം ചെയ്യ്…എനിക്ക് രണ്ട് പെണ്മക്കളാ..കല്യാണം കഴിഞ്ഞു ചെറുക്കനും പെണ്ണും ഇവിടെ താമസിച്ചോളും..ഞങ്ങൾക്കൊരു കൂട്ടുമാകുമല്ലോ…പിന്നെ…. ചെക്കന്റെ ശമ്പളത്തീന്നു നയാ പൈസ ഞങ്ങൾക്ക് വേണ്ട…മൊത്തം അങ്ങോട്ട് അയച്ചോട്ടെ…അവന്റെ മാതാപിതാക്കൾക്ക്… “
അമ്മാവൻ ചെറുക്കനെയും അച്ഛനെയുമൊന്ന് നോക്കി. എന്നിട്ട് വീടിനുൾവശമാകമാനം ഒന്ന് വീക്ഷിച്ചു. ചെറിയ വീടാണ്. ചെറുക്കന്റെ വീടിന്റെ നാലിലൊന്നു വലിപ്പമില്ല.
” ചെറുക്കൻ ധനം എന്ത് തരും?””
“എഹ്..!! “
ഓർക്കാപ്പുറത്ത് അശരീരി കേട്ട പോലെ അമ്മാവൻ തക്കം പുക്കം നോക്കി.
“അല്ലാ… പെണ്ണിനെ പോറ്റാനും തീറ്റാനും ആണല്ലോ നിങ്ങൾ സ്ത്രീധനം ചോദിച്ചത്…കൂട്ടത്തിൽ അവളുടെ ഇനിയുള്ള കാലത്തെ അധ്വാന ഫലവും വേണം…പോരാഞ്ഞിട്ട് വീട്ടുജോലികളും ചെയ്യണം… ഇതൊന്നും വേണ്ട…ചെറുക്കനിവിടെ പണിയൊന്നും ചെയ്യണ്ട… ശമ്പളവും തരണ്ട.. ആയുഷ്കാലം ജീവിക്കാം…അതിനുള്ള ചെറുക്കൻ ധനം എന്ത് തരുമെന്നാ ചോദിച്ചത്?”
“എടാ ചെറുക്കാ…എണീക്കടാ…അളിയാ ഇവനൊക്കെ പെണ്ണിനെ കെട്ടിക്കാൻ നടക്കുന്നതല്ല… അവനൊരു വരുമാനമാർഗ്ഗമാ…നാട്ടിൽ വേറെ പെമ്പിള്ളേരി ല്ലാത്ത പോലെ…ബാ ..നമ്മക്കിറങ്ങാം…ഇവന്റെ പിള്ളേർ മൂക്കിൽ പല്ലും കിളിർത്തു നിൽക്കത്തേ ഉള്ളൂ…”
അമ്മാവൻ ദേഷ്യപ്പെട്ട് അളിയനേം മാരുമകനേം വിളിച്ചോണ്ടിറങ്ങി.
” ദേ..മനുഷ്യാ… മൂട്ടിൽ വെയിലടിക്കും വരെ കിടന്നുറങ്ങുവാണോ…വല്ല പണിയും കിട്ടുമൊന്ന് നോക്ക്…ഞാൻ തൊഴിലുറപ്പിന് പോകുവാ…. രണ്ട് പെമ്പിള്ളേരാ…ആ ഓരോർമയുമില്ലാതാ ഇങ്ങേരിവിടേ കിടന്ന് പോത്തിനെ പോലെ ഉറങ്ങുന്നെ… പൊന്നിനിന്ന് പവന് ഒരു ലക്ഷം കവിഞ്ഞെന്ന് പത്രത്തിൽ കണ്ട…കൊറഞ്ഞത് പത്തു പവനെങ്കിലും പെണ്ണിനെ ഇടിക്കാതെ കല്യാണപ്പന്തലിലേക്ക് നാട്ടുകാരുടെ മുന്നിലേക്ക് ഇറക്കാനോക്കുമോ? പിന്നെ കല്യാണ ചെലവ്..ഹാള്.. വീഡിയോ.. അടുക്കള കാണൽ.. “”
“സേട്ടാ…ഇന്ന് പണി ഒണ്ടോ.. ഇല്ലെങ്കിൽ ബാ…”
വീടിന്റെ വാതിൽക്കൽ വന്നു നിർത്തിയ പിക്കപ്പിൽ നിന്ന് ബംഗാളി ഭായി ഉച്ചത്തിൽ വിളിച്ചു ചോദിച്ചപ്പോൾ സ്വപ്നത്തിലെ അതികായനായ അച്ഛനെ ,ഭാര്യക്ക് മുന്നിൽ തലകുനിച്ചു നിർത്തി അയാള് പണിയായുധങ്ങൾ എടുത്തു കൊണ്ട് പിക്കപ്പിലേക്കോടി…പവന് ഒന്നര ലക്ഷം എത്തുന്നതിന് മുൻപ് സ്ത്രീധനം ഒപ്പിക്കാനായി.
☆☆☆☆☆☆☆☆☆☆
