എല്ലാം നന്നായി മുന്നോട്ടുപോകവേ പുതുതായി വന്ന പയ്യന്റെ ഇടിയേറ്റ് റിഷിയുടെ വായിൽനിന്നും ചോര വന്നു…….

ലൊക്കേഷൻ

എഴുത്ത് :-ഭാഗ്യലക്ഷ്മി. കെ. സി

പൂത്തിരുവാതിര സിനിമയുടെ ഷൂട്ടിങ് തീരാറായി. സംവിധായകൻ കൌശിക് കടുത്ത മാനസികസംഘ൪ത്തിലാണ്. ക്ലൈമാക്സ് കൂടി ചിത്രീകരിച്ചുകഴിഞ്ഞാൽ കുറച്ച് സമാധാനമായി. പ്രധാനനടൻ സൈമണിന് രണ്ടുദിവസം കഴിഞ്ഞ് പുതിയ ചിത്രത്തിൽ ജോയിൻ ചെയ്യേണ്ടതാണ്. ഇന്ന് ലാസ്റ്റ് ഡേറ്റാണ്.

ശങ്ക൪, എന്താ താമസം?

അയാൾ അസിസ്റ്റന്റിനോട് ചോദിച്ചു.

എല്ലാം റെഡി സ൪..

ഇന്ന് വന്ന പയ്യൻ എങ്ങനെയുണ്ട്? ഫൈറ്റിങ് സീൻ കുളമാക്കുമോ?

ഏയ്.. അവൻ കൊള്ളാം സ൪.. നന്നായി ചെയ്യുന്നുണ്ട്..

ഓ‌കെ..

സ്റ്റാർട്ട്…

ക്യാമറ…

ആക്ഷൻ..

സൈമണും അനിയനായി അഭിനയിക്കുന്ന റിഷിയും എതിരാളികളുമായുള്ള സ്റ്റണ്ട് സീനാണ്.

എല്ലാം നന്നായി മുന്നോട്ടുപോകവേ പുതുതായി വന്ന പയ്യന്റെ ഇടിയേറ്റ് റിഷിയുടെ വായിൽനിന്നും ചോര വന്നു.

കട്ട്..

എല്ലാവരും ഓടിവന്നു.

എന്താ ഉണ്ടായത്?

കൌശിക് ആ പയ്യനെ രൂക്ഷമായി ഒന്ന് നോക്കി. അവൻ അറിയാതെ പറ്റിയതാണെന്ന ഭാവത്തോടെ നിന്നു.

റിഷി വായ‌കഴുകിക്കൊണ്ടു പറഞ്ഞു:

ഏയ്‌.. കുഴപ്പമില്ല.. നമുക്ക് കൺടിന്യൂ ചെയ്യാം.. വൈകിക്കണ്ട..

അടുത്ത സീനൊക്കെ ഓകെ ആയപ്പോൾ എല്ലാവരും ഹാപ്പി ആയി. സൈമണ് ഇനിയൊരു ഷോട്ട് മാത്രമേയുള്ളൂ. അതുകൂടി എടുത്ത് അദ്ദേഹത്തെ പറഞ്ഞുവിടാമെന്ന കണക്കുകൂട്ടലിൽ കൌശിക് വീണ്ടും തയ്യാറെടുക്കുമ്പോൾ അദ്ദേഹത്തെ കാണാൻ ആരോ വന്നു.

കൌശിക്.. ഞാൻ ദേ വന്നു.. ഒരഞ്ച് മിനുറ്റ്..

അയാൾക്ക് നോ പറയാനിട കിട്ടുന്നതിനുമുമ്പേ സൈമൺ വന്നയാളുമായി സംസാരം തുടങ്ങി.

ഇനിയിപ്പോ മറ്റ് സീൻ വല്ലതും എടുക്കാം അല്ലേ സ൪?

ശങ്കറിന്റെ ചോദ്യത്തിന് അയാൾ തലയാട്ടി സമ്മതം കൊടുത്തു.

വീണ്ടും ഫൈറ്റ് സീനിന്റെ ക്ലോസപ്പ് എടുക്കാൻ തുനിഞ്ഞതും ക്യാമറാമാൻ കൌശികിനെ രഹസ്യമായി വിളിച്ച് സ്വകാര്യമായി പറഞ്ഞു:

ആ‌ വന്ന പയ്യൻ എന്തോ ഉദ്ദേശിച്ചാണ്…

എന്തേ?

അവന്റെ വിരലിൽ ഒരു മോതിരമുണ്ട്.. അതിന്റെ ഒരുവശം എന്തോ മാരകമായ കൊത്തുപണിയുണ്ട്.. അവനത് ഇടയ്ക്കിടെ ശരിയാക്കിവെക്കുന്നുമുണ്ട്. നമ്മുടെ റിഷിയുടെ നേ൪ക്ക് അവൻ പകയോടെ നോക്കുന്നുണ്ട്.. എനിക്കെന്തോ…

ശരി.. നോക്കാം… നമുക്ക് ടേക്ക് പോകാം…

വേണോ?

പിന്നെന്തു ചെയ്യും?

അയാളെ വിളിച്ചൊന്ന് ചോദിച്ചിട്ട്…

എന്താ ചോദിക്കുക?

കൈയിലുള്ള മോതിരം ഊരിവെക്കാൻ പറഞ്ഞാലോ? കഴിഞ്ഞ പ്രാവശ്യം അറിയാതെ പറ്റിയതാണെന്ന് എനിക്ക് തോന്നുന്നില്ല..

കൌശിക് അവനെ വിളിച്ചു.

എന്താ പേര്?

ശിവ..

ഈ മോതിരമങ്ങ് മാറ്റിയേക്ക്.. വീണ്ടും ചോര പൊടിയണ്ട..

ഓകെ സ൪…

അവനത് ഊരി പോക്കറ്റിലിട്ടപ്പോൾ ക്യാമറാമേനും ആശ്വാസമായി.

സ്റ്റാർട്ട്..

ക്യാമറ…

ആക്ഷൻ…

പറന്നടിക്കുന്ന ശിവയെയും ഒഴിഞ്ഞുമാറുന്ന റിഷിയെയും നോക്കി നിൽക്കുക യായിരുന്നു അയാൾ. പെട്ടെന്നാണ് അത് സംഭവിച്ചത്.. റിഷിയുടെ വായിൽനിന്നും ഒരു പല്ല് തെറിച്ചു.

കട്ട്…

എല്ലാവരും ഓടിക്കൂടി. ശിവയെ കൈയേറ്റം ചെയ്യാൻ റിഷി ഓടിയടുത്തു.

നീ മനഃപൂ൪വ്വം എന്നോട് പ്രതികാരം തീ൪ക്കാൻ വന്നതാണോ?

അവന്റെ കോളറിൽക്കയറിപ്പിടിച്ച് റിഷി അലറി. അപ്പോഴാണ് സൈമൺ ബഹളം കേട്ട് അങ്ങോട്ട് വന്നത്.

എന്താ? എന്താ പ്രശ്നം?

ഇവൻ മുൻവൈരാഗ്യം തീർക്കാൻ നോക്കുകയാ…

റിഷി സൈമണോട് കിതച്ചുകൊണ്ട് പറഞ്ഞു.

അതിന് മുൻവൈരാഗ്യമുണ്ടാവാൻ നമ്മൾ തമ്മിൽ എന്തെങ്കിലും പരിചയമുണ്ടോ സ൪?

ശിവ കൂസലില്ലാതെ ചൊടിച്ചു.

ആ സമയത്ത് റിഷിയൊന്ന് പതറി. സൈമണും കൌശികും ശങ്കറുമൊക്കെ ആ പത൪ച്ച വ്യക്തമായിക്കണ്ടു. എന്തൊക്കെയോ കുഴപ്പമുണ്ട് എന്ന് കൌശികിന് തോന്നി. ഇപ്പോഴതൊക്കെ അന്വേഷിക്കാൻനിന്നാൽ ഷൂട്ടിങ് പിന്നേയും വൈകും.

പായ്ക്കപ്പ് പറയുന്നതിനുമുമ്പ് നായകന്റെ സീൻസൊക്കെ എടുത്ത് തീ൪ത്തു.

എല്ലാവരും പിരിയാനൊരുങ്ങുമ്പോൾ സൈമൺ കൌശികിന്റെ അടുത്തുവന്ന് ശബ്ദംതാഴ്ത്തി പറഞ്ഞു:

അവന്റെ മുഖം കണ്ടിട്ട് എനിക്കെന്തോ നല്ല പരിചയം.. ആ ശിവയുടെ.. അഞ്ചാറ് വർഷങ്ങൾക്കുമുമ്പ് ഞാനഭിനയിച്ച ഒരു സിനിമയിൽ ജൂനിയർആ൪ട്ടിസ്റ്റായി ഒരു പെൺകുട്ടി അഭിനയിച്ചിരുന്നു. അവളുടെ അനിയനാണോ എന്ന് സംശയമുണ്ട്..

ആണോ? അവൻ മനഃപൂ൪വ്വം പ്രശ്നമുണ്ടാക്കാൻ വന്നതാണോ?

ആയിരിക്കാനിടയുണ്ട്… കാരണം അന്ന് അവളുടെ അടുത്ത് റിഷി മോശമായി പെരുമാറി എന്നുപറഞ്ഞ് അവളുടെ അമ്മ പ്രശ്നമുണ്ടാക്കിയിരുന്നു. അതോടെ അവളെ കൂലികൊടുത്ത് പറഞ്ഞുവിടുകയാണുണ്ടായത് എന്ന് അന്നവിടെ പറഞ്ഞുകേട്ടിരുന്നു. ഞാനന്ന് അവിടെ ഉണ്ടായിരുന്നില്ല..

സാറിന് പോകേണ്ടതല്ലേ? വൈകില്ലേ?

കൌശിക്, വേണ്ടാത്ത പൊല്ലാപ്പൊന്നും തലയിലെടുത്തുവെക്കാൻ വയ്യ എന്നമട്ടിൽ പറഞ്ഞൊഴിയാൻ നോക്കി.

സൈമൺ വിടുന്നമട്ടില്ല. അയാൾ ശിവയെ കൈകാട്ടി വിളിച്ച് അടുത്തിരുത്തി. ഇതുകണ്ട റിഷിയും ഓടിവന്ന് അവരുടെ ഇടയിലിരുന്നു. രണ്ടുപേരുടെയും മുഖം ചുവക്കുന്നതും കോപം കൊണ്ട് വിറക്കുന്നതുംകണ്ട കൌശിക് ശങ്കറിനോട് പറഞ്ഞു:

പോലീസിനെ വിളിച്ചോളൂ.. ഇതിവിടംകൊണ്ടൊന്നും തീരുന്ന ലക്ഷണമില്ല. പറ്റു മെങ്കിൽ ആ ചാനലുകാരെയും വിളിച്ചേക്ക്..

ലൊക്കേഷനിൽനിന്നും റിഷിയെയും ശിവയെയും പോലീസ് വന്ന് സ്റ്റേഷനിലേക്ക് കൂട്ടിക്കൊണ്ടുപോയി.

പിറ്റേന്നത്തെ വാർത്തയിൽ പീ ഢനശ്രമത്തിൽ റിഷിയെ അറസ്റ്റ് ചെയ്തു എന്ന് കാണാൻ കാത്തിരുന്ന ആ൪ക്കുംതന്നെ അങ്ങനെ യാതൊന്നും കാണാൻ കഴിഞ്ഞില്ല.

ഒരു പ്രശ്നവുമില്ലെന്ന് ശിവയും, പല്ല് കൊഴിഞ്ഞത് ഷൂട്ടിങ്സമയത്ത് അബദ്ധത്തിൽ പറ്റിയതാണ്,‌ തനിക്ക് പരാതിയൊന്നുമില്ലെന്ന് റിഷിയും എഴുതിക്കൊടുത്തതോടെ രണ്ടുപേരെയും പോലീസ് പോകാൻ അനുവദിച്ചു.

പുറത്തിറങ്ങിയ ശിവ വീട്ടിലേക്ക് ഫോൺ ചെയ്തു പറഞ്ഞു:

അമ്മേ, ചേച്ചിയോട് പറയണം ഞാൻ വാക്ക് കൊടുത്തതുപോലെ അവന്റെ അണപ്പല്ല് ഇടിച്ച് തെറിപ്പിച്ചിട്ടുണ്ട് എന്ന്.