എഴുത്ത്:-സജി തൈപ്പറമ്പ് , ( തൈപ്പറമ്പൻ)
ഭാര്യയ്ക്ക് ഓർമ്മക്കുറവ് തുടങ്ങിയിട്ട്കു റച്ചു നാളുകളായി,
ആദ്യമൊക്കെ ചെറിയ രീതിയിലായിരുന്നെങ്കിൽ പിന്നീട് വലിയ വലിയ മറവികളിലേയ്ക്ക് പോകുതോറും എനിയ്ക്ക് ആധിയായി
ബാത്റൂമിൽ നിന്നിറങ്ങിയാൽ ലൈറ്റും എയർഫാനും ഓഫ് ചെയ്യാൻ മറക്കുക മോട്ടോർ പമ്പ് ഓഫ് ചെയ്യാൻ മറക്കുക എന്നിവയായിരുന്നു തുടക്കത്തിലെങ്കിൽ ഈയിടെയായി പാചകം കഴിഞ്ഞാലും ഗ്യാസ് ഓഫ് ചെയ്യാൻ മറക്കുന്ന ഘട്ടത്തിൽ വരെ എത്തിയപ്പോഴാണ് ഡോക്ടറെ കണ്ടേ മതിയാകു എന്ന നിലപാടിൽ ഞാനെത്തിയത്
ഒടുവിൽ അവളെയും കൊണ്ട് ഡോക്ടറുടെ ക്ളിനിക്കിൽ ചെന്ന് ടോക്കൺ എടുത്തിട്ട് അവസരത്തിനായി ഞങ്ങൾ കാത്തിരുന്നു
എടീ,, നീ ഇറങ്ങാൻ നേരത്ത് ,ഗ്യാസ് ഓഫ് ചെയ്തോന്ന് നോക്കിയോ?
സംശയം കൊണ്ട് ഞാനവളോട് ചോദിച്ചു.
അയ്യോ ഇക്കാ ഞാനത് മറന്നു, നിങ്ങള് ഡോറ് പൂട്ടുമ്പോഴെങ്കിലും എന്നോടൊന്ന് ചോദിച്ചൂടാരുന്നോ?
പടച്ചോനെ, എടീ അപ്പോൾ സ്റ്റൗവ്വിലിരുന്ന ബീഫ് ഫ്രൈ ഇപ്പോൾ കരിഞ്ഞ് ക,ത്തി കാണുമല്ലോ?
എൻ്റെ ആധി മുഴുവൻ അതായിരുന്നു.
അത് പിന്നെ കരിയാണ്ടിരിക്കോ ?അത് പോട്ടെ ,നാന്നൂറ് രൂപയുടെ കാര്യമല്ലേ ഉള്ളു , പക്ഷേ ,എൻ്റെ പുതിയ കടായി ,ഇനി ഒന്നിനും കൊള്ളാതായി കാണില്ലേ? ഷെൽഫിൽ കവറ് പൊട്ടിക്കാതെ ഞാനിത് വരെ സൂക്ഷിച്ച് വച്ചിരുന്നതായിരുന്നത്, നിങ്ങടെ ഒറ്റ നിർബന്ധം കൊണ്ടാണ്, ഇന്ന് ഞാനത് ബീഫ്ഫ്രൈ ചെയ്യാൻ വേണ്ടി എടുത്തത്, മര്യാദയ്ക്ക് ഇവിടുന്ന് പോകുമ്പോൾ, നെസ്റ്റോയിൽ കയറി, എനിയ്ക്ക് പുതിയ കടായി വാങ്ങി തന്നോളണം ,
പടച്ചോനെ, പണിയായ ?,മൂന്ന് കൊല്ലം മുൻപ് ഞങ്ങടെ ഹൗസ്വാമിങ്ങിന് ആരോ കൊണ്ട് തന്നതായിരുന്നു ആ കടായി ,അത് മാത്രമല്ല അത് പോലെ കുറെ പാത്രങ്ങൾ, സ്വാതന്ത്ര്യം കിട്ടാതെ ,ഷെൽഫിൽ തന്നെയിരിപ്പുണ്ട് , ഇപ്പോൾ നശിച്ച് പോയത് പോലത്തെ കടായിയുമുണ്ട്, എന്നിട്ടും വേറേത് വാങ്ങി കൊടുക്കണമെന്നാണ് അവള് പറയുന്നത് , എന്തിനാന്നറിയുമോ , പഴയ കടായി എടുത്തപ്പോൾ ,ഷെൽഫിൽ വന്ന ആ വിടവ് നികത്തണ്ടെ? അതിനാണ് ,
അല്ലാ നിങ്ങളെന്താ ആലോചിയ്ക്കുന്നത് ?
അല്ലടീ ,,കടായിയും ബീഫും മാത്രമല്ലല്ലോ പോകുന്നത് ,ഗ്യാസും ക,ത്തി തീർന്ന് കൊണ്ടിരിക്കുവല്ലേ?
ഞാൻ വേവലാതിയോടെ ചോദിച്ചു
അതിന് നിങ്ങള് വേണ്ടാറാവണ്ടാ, ഇന്നലെ രാത്രി ഗ്യാസ് തീർന്നപ്പോൾ ഞാൻ അപ്പുറത്തെ സൗദാൻ്റെ സിലിണ്ടറ് വാങ്ങിച്ചാണ് കണക്ട് ചെയ്തിരിക്കുന്നത്, അതിനകത്ത് കുറച്ച് ഗ്യാസേ ഉണ്ടാവൂ
അത് നിനക്കെങ്ങനെ അറിയാം,,
അവര് ഉപയോഗിച്ച് മാറ്റി വച്ചിരുന്നത് ഞാനൊറ്റയ്ക്കല്ലേ എടുത്തോണ്ട് വന്നത്, അപ്പോഴെ ഞാനവളോട് പറഞ്ഞായിരുന്നു, ഇതിപ്പോ കാലിയാകൂന്ന് ,അപ്പോൾ അവള് പറയുവാ, അതെനിക്കിയാം ,പകരം ഗ്യാസ് തരണ്ടാ ,സിലിണ്ടറ് മാത്രം തിരിച്ച് തന്നാൽ മതിയെന്ന് ,,
അതും പറഞ്ഞ് ഭാര്യ സന്തോഷത്തിൽ ചിരിച്ചു.
അത് പിന്നെ , തിരിച്ച് കൊടുക്കാതിരിക്കാനാണ് നീ അങ്ങനെ പറഞ്ഞതെന്ന്, ബുദ്ധിമതിയായ അവൾക്ക് മനസ്സിലായിക്കാണും,
ഓഹ് പിന്നേ, നിങ്ങള് ആള് കൊള്ളാമല്ലോ? അപ്പോൾ ഞാൻ മണ്ടിയും മേടിച്ചാൽ കൊടുക്കാത്തവളുമാണല്ലേ ? അല്ലേലും സൗദാടെ കാര്യം പറയുമ്പോൾ നിങ്ങൾക്ക് നൂറ് നാവാണ് , എന്താ ഒരു സന്തോഷം !
നിങ്ങള് ആള് കോഴിയാണെന്ന് പണ്ടേ എനിക്കറിയാം , പത്താം ക്ളാസ്സിൽ പഠിച്ചപ്പോൾ ഷീജ കോളേജിൽ പോയപ്പോൾ ഷാനീ , ട്യൂഷൻ പഠിപ്പിക്കാൻ പോയപ്പോൾ ഗീത ടീച്ചർ , , ,ഇതൊക്കെ ആദ്യരാത്രിയിൽ നിങ്ങള് എന്നോട് പറഞ്ഞ കാമുകിമാരാണ്, പറയാത്തത് വേറെ എത്രയെണ്ണം കാണും? അല്ലാ ,,അത് പറഞ്ഞപ്പോഴാണ് ഓർത്തത് ,
നിങ്ങളിന്നലെ എഴുതിയ കഥയിലൊരു ഗീത ടീച്ചറായിരുന്നല്ലോ നായിക , അവളുടെ സൗന്ദര്യത്തെ കുറിച്ചും സൽസ്വഭാവത്തെ കുറിച്ചുമൊക്കെ കുറെ എഴുതി പിടിപ്പിച്ചിട്ടുണ്ടല്ലോ? ശരിയ്ക്കും ആ നായിക നിങ്ങളുടെ പഴയ കാമുകിയല്ലേ?
എൻ്റെ റബ്ബേ, ഇവളാ പഴയ കഥകൾ ഇത് വരെ മറന്നില്ലേ? അപ്പോൾ പിന്നെ ഇവൾക്ക് മറവി രോഗമുണ്ടെന്ന് പറയുന്നത് വെറുതെയല്ലേ?
ഡീ നീ വേഗം എഴുന്നേല്ക്ക്, നമുക്കാദ്യം വീട്ടിൽ പോയി ക, ത്തി കൊണ്ടിരിക്കുന്ന സ്റ്റൗ ഓഫ് ചെയ്യാം, ഇല്ലെങ്കിൽ ചിലപ്പോൾ ,നമ്മൾ തിരിച്ച് ചെല്ലുമ്പോൾ ,കേറിക്കിടക്കാൻ ആ പൊര അവിടെയുണ്ടാവില്ല ,
അടുത്ത ചോദ്യം ഉയരുന്നതിന് മുമ്പ് ഞാനവളെയും കൊണ്ട് അവിടുന്ന് കഴിച്ചിലായി
അല്ലേലും ഈ ഭാര്യമാർക്ക് മറവിയുണ്ടെന്ന് പറയുമ്പോൾ കണ്ണും പൂട്ടിയത് വിശ്വസിക്കുന്ന എന്നെപ്പോലെയുള്ള ഭർത്താക്കന്മാരാണ് വിഡ്ഡികള് വെറുതെയാണ്, നമുക്ക് സമാധാനം കിട്ടുന്ന ഒന്നും അവര് മറക്കാറില്ല😀😄😄
☆☆☆☆☆☆☆☆
