എഴുത്ത്:- സൽമാൻ സാലി
കയ്യിലൊരഞ്ചിന്റെ പൈസ ഇല്ലാണ്ട് ഭാസ്കരേട്ടന്റെ കടേല് നാരങ്ങാസോഡായും കുടിച്ചു മാതൃഭൂമി പേപ്പറിൽ ഇന്നത്തെ സിനിമയും നോക്കി ഇരിക്കുമ്പോഴേക്കും ചങ്ങായിമാർ അവിടെ എത്തി ..
അല്ലേലും കയ്യിൽ കായ് ഇല്ലേല് എല്ലാത്തിനേം ഭാസ്കരേട്ടന്റെ കടയില് കാണും ..
പഴം ചക്കയുടെ അടുത്ത് ഈച്ച വരുന്നതുപോലെ ഭാസ്കരേട്ടന്റെ കടയും ചുറ്റിപറ്റി എല്ലാരും ഉണ്ടാകും ..
ഒരുത്തൻ വന്ന് പോയാൽ അങ്ങേര് പറ്റ് ബുക്കിൽ രണ്ടുറുപ്പിയ എഴുതും ഓനെന്തേലും വാങ്ങീണ്ടാവും എന്നാണ് മൂപ്പരുടെ കണക്ക് ..
” എടാ ഞമ്മക്ക് ഒരു ട്രിപ്പ് അടിച്ചാലോ .. ?
കൂട്ടത്തിൽ ഏറ്റവും തരികിടയും എന്നാൽ മറ്റുള്ളവരുടെ വീട്ടുകാരുടെ മുന്നിൽ ഏറ്റവും നല്ല കുട്ടിയുമായി ഇല്യാസിന്റെ ചോദ്യത്തിന് എല്ലാരും റെഡി എന്ന് മറുപടി കൊടുത്തു ..
””അയ്ന് അന്റെല് കായ് ണ്ടോ ..?
നാരങ സോഡ കുടിച്ചത് പറ്റ് ബുക്കിൽ എഴുതാൻ പറഞ്ഞതിന് ഭാസ്കരേട്ടന്റെ കയ്യിന്ന് വയറ് നിറച്ചു കിട്ടി ഇരിക്കുമ്പോളാണ് ഓന്റെ ഒരു ട്രിപ്പ് ..
” അതൊക്കെ ഞമ്മക്ക് സെറ്റാക്ക .. ഇയ്യ് ണ്ടേൽ പറ ബൈക്കില് പെട്രോൾ അടിച്ചാൽ മതി ഫുഡ് ഞമ്മക്ക് വന്നിട്ട് കൈക്കാം …
പന്ത്രണ്ട് മണിയാവുമ്പോൾ എല്ലാരും ഭാസ്കരേട്ടന്റെ കടയിൽ എത്തുക എന്ന് തീരുമാനിച്ചു എല്ലാരും പിരിഞ്ഞു …
വീട്ടിലെത്തി ഉമ്മാന്റെ കയ്യിന്ന് ന്തെലും ഒപ്പിക്കാം എന്ന് കരുതിയാണ് വന്നത് .. കേറി വന്നതും ” ഡാ സാലിയെ ഇയ്യ് റേഷന്കടയിൽ പോയിട്ട് വാ ഇന്നൂടെ പോയില്ലേൽ ഈ മാസത്തെ റേഷൻ തള്ളി പോകും ..!!
കയ്യില് കായും ഇല്ലാ ട്രിപ്പ് പോവേം മാണം എന്നാലോയ്ച്ചു ചടച്ചിരിക്കുമ്പോളാണ് മ്മാന്റെ ഒരു റേഷൻകട … ഇനി പോയില്ലേൽ ഉമ്മച്ചി പച്ചമടൽ വെട്ടി വീടിന് ചുറ്റും ഓടിച്ചിട്ട് തല്ലും എന്നറിയാവുന്നതുകൊണ്ട് സൂര്യ ടെസ്റ്റൈൽസിന്റെ സഞ്ചിയും കയ്യിക്കൊരു മണ്ണെണ്ണ മണക്കുന്ന വിനാഗിരിയുടെ കുപ്പിയുമായി റേഷന്കടയിൽ പോയി …
അവിടെ ആണേൽ മാസാവസാനം ആയതുകൊണ്ട് മുടിഞ്ഞ തിരക്കും .. കാർഡ് വിളിച്ചു അരിയും മണ്ണെണ്ണയും വാങ്ങി തിരിച്ചു വരുമ്പോഴേക്കും രണ്ട് മണി ആയിക്ക് …
ട്രിപ്പ് പോകാൻ പറ്റാത്ത വിഷമം ചോറിനോട് തീർത്ത് രണ്ട് പ്ലേറ്റ് ചോറും തിന്ന് മെല്ലെ ഭാസ്കരേട്ടന്റെ കടയിലേക്ക് നടക്കുമ്പോൾ ആ കുരിപ്പിങല് ട്രിപ്പ് പോയിണ്ടാവും എന്ന വിഷമം ആയിരുന്നു …
ഭാസ്കരേട്ടന്റെ കടയിൽ എത്തിയപ്പോ സകല കുരിപ്പിങളും ആ തറയില് കുത്തിയിരുന്ന് പൂജ്യം വെട്ടിക്കളിക്കുന്നു ..
” അല്ലടാ ഇങ്ങള് പോയില്ലേ …?
” ഇജ്ജോന്ന് മുണ്ടാണ്ടിരിക്ക് സാലിയെ .. സോഡ കുടിക്കാൻ കായ് ഇല്ലാ അപ്പോളാണ് ഓന്റെ ഒരു ട്രിപ്പ് ..!!
അപ്പോളാണ് ഇൻക് സമാധാനം ആയത് ..
റേഷന്കടയിലെ ബില്ല് തിരുത്തിയ വകയിൽ അടിച്ചു മാറ്റിയ രണ്ടുറുപ്പിയ റെഡി ക്യാഷ് കൊടുത്ത് ഒരു സോഡയും വാങ്ങി അവരുടെ അടുത്ത് വന്നിരുന്ന് ഓരോ സിപ്പ് അഞ്ചുപേരും എടുത്തപ്പോഴേക്കും സോഡ തീർന്നിരുന്നു …
അവരോടൊപ്പം കൂടി പൂജ്യം വെട്ടികൊണ്ടിരിക്കുമ്പോൾ നൗഷിക്കിന്റെ ചോദ്യം ” എടാ ഞമ്മക്ക് നാളെ വായനാട്ടിലേക്ക് ഒരു ട്രിപ്പ് അടിച്ചാലോ …?
എന്നെങ്കിലും പോകും എന്ന പ്രതീക്ഷയിൽ കയ്യില് അഞ്ചിന്റെ പൈസ ഇല്ലേലും എന്നും ടൂർ പ്ലാൻ ചെയ്യുന്ന ഞങ്ങളെ സഹിക്കാൻ ഭാസ്കരേട്ടന്റെ ജന്മം ഇനിയും ബാക്കി …
