എനിക്ക് പത്ത് വയസ്സൊക്കെയാണെന്ന് തോന്നുന്നു. അച്ഛന് മറ്റൊരു സ്ത്രീയുമായുള്ള പരസ്യമായ ബന്ധം അമ്മ തെളിവ് തിരത്തി സ്ഥാപിക്കുകയാണ്. നിന്നെയൊന്നും തനിക്ക് ബോധ്യപ്പിക്കേണ്ട കാര്യമില്ലെന്നും…..

എഴുത്ത്:-ശ്രീജിത്ത് ഇരവിൽ

അച്ഛനോട് വഴക്കിട്ട് തോറ്റിരിക്കുന്ന അമ്മയുടെ അടുത്തേക്ക് പോകാനേ കഴിയില്ല. എന്ത്‌ ചോദിച്ചാലും പറഞ്ഞാലും കയർക്കും. ചിലപ്പോൾ താടിക്കൊരു തട്ടും നടുപ്പുറത്തൊരു കുത്തും തരും. എന്നാലും അമ്മയ്ക്ക് എന്നോട് സ്നേഹമാണ്. ചില ഉറക്കങ്ങളിൽ നേർത്ത തലോടലുകളായി ഞാനത് അറിയാറുണ്ട്…

എനിക്ക് പത്ത് വയസ്സൊക്കെയാണെന്ന് തോന്നുന്നു. അച്ഛന് മറ്റൊരു സ്ത്രീയുമായുള്ള പരസ്യമായ ബന്ധം അമ്മ തെളിവ് തിരത്തി സ്ഥാപിക്കുകയാണ്. നിന്നെയൊന്നും തനിക്ക് ബോധ്യപ്പിക്കേണ്ട കാര്യമില്ലെന്നും പറഞ്ഞ് അച്ഛൻ അമ്മയ്ക്ക് മുഖം കൊടുക്കാതെ വീട് മുഴുവൻ നടക്കുന്നു. ഏത് സമയവും പൊട്ടിത്തെറിക്കാൻ പോകുന്ന മാലപ്പടക്കത്തിന്റെ അരികിൽ നിൽക്കുന്ന ഭയത്തിൽ ഞാനൊരു മൂലയ്ക്ക് പതുങ്ങി…

വൈകാതെ, പ്രതീക്ഷിച്ചത് പോലെ തന്നെ കിണ്ണം പാറുന്ന ഒ,രടി അമ്മയുടെ മുഖത്ത് വീണു. സാധാരണ ഇങ്ങനെ കിട്ടിയാൽ കൈയ്യിൽ കിട്ടുന്നതെല്ലാം വലിച്ച് വാരി താഴെയിട്ട്, വീണ്ടും അച്ഛന്റെ കയ്യിൽ നിന്നും രണ്ടെണ്ണവും കൂടി വാങ്ങി മുറിയിൽ പോയി കരയാറാണ് അമ്മയുടെ പതിവ്. ഇന്നെന്തോ അങ്ങനെ ഉണ്ടായില്ല. മുറുക്കിയടച്ച എന്റെ കണ്ണുകൾ തുറക്കുമ്പോൾ അടികിട്ടിയ ഇടത്ത് തന്നെ അമ്മ തറച്ച് നിൽക്കുകയായിരുന്നു…

‘എനിക്ക് നിങ്ങളെ വേണ്ട…! ഇതിനെയും കൊ,ന്ന് ഞാനും ചാ,കും…’

ഇതിനെയെന്ന് പറഞ്ഞാൽ എന്നെയാണ്…. അമ്മ രണ്ട് കൈകൾ കൊണ്ടും കണ്ണൊക്കെ തുടച്ച് മുടിയൊക്കെ കെട്ടിയുറപ്പിച്ച് വളരെ സമയമെടുത്താണ് പറഞ്ഞത്.

“കൊ,ല്ലെടീ… ഇതെന്റേത് തന്നെയെന്നതിന് ഉറപ്പൊന്നുമില്ലല്ലോ…! “

കേൾക്കേണ്ട താമസം അമ്മ എന്റെ ഇടത് കൈയ്യിൽ ബലമായി പിടിച്ചു. തുടർന്ന് , വലിച്ച് വീടിന് പുറത്തേക്ക് നടന്നു. അമ്മ എന്നേയും കൊണ്ടിത് എങ്ങോട്ടാണെന്ന് കിണറ്റിൻ കരയിലേക്ക് എത്തുന്നതുവരെ എനിക്ക് മനസ്സിലായിട്ടുണ്ടായിരുന്നില്ല. അത് മനസ്സിലായതിന് ശേഷമുള്ള ഓർമ്മ തുറന്നത് ഒരു ആശുപത്രിയിലെ സീലിംഗ് ഫാനിലേക്കാണ്.

നാളുകൾ കഴിഞ്ഞിട്ടാണ് സംഭവിച്ചതൊക്കെയും അറിയുന്നത്. എന്നേയും കൊണ്ട് കിണറ്റിലേക്ക് ചാടിയ അമ്മ കിണറിലെ ഉൾപ്പടവിൽ തലയിടിച്ച് മരിച്ചിരിക്കുന്നു. വെള്ളത്തിലേക്ക് വീണത് കൊണ്ട് അച്ഛന് എന്നെ രക്ഷപ്പെടുത്താൻ സാധിച്ചു.

കൊമ്പൻ മീശയും ലാത്തിയുമില്ലാത്ത പോലീസുകാർ എന്താണ് ഉണ്ടായതെന്ന് ചോദിച്ചപ്പോൾ അച്ഛൻ അമ്മയെ ത,ല്ലിയ കാര്യം ഞാൻ പറഞ്ഞു. പറയുമ്പോൾ കരഞ്ഞ് മൂക്കള ഒലിപ്പിച്ച് നിന്നത് കൊണ്ടായിരിക്കും കൂടുതലായൊന്നും അവർ ചോദിച്ചില്ല.

അവർ പോയപ്പോഴാണ് മൂത്തമ്മയോട് അച്ഛൻ എവിടെയാണെന്ന് ഞാൻ തിരഞ്ഞത്. അച്ഛന്റെ മൂത്ത സഹോദരിയെ മൂത്തമ്മയെന്നാണ് വിളിച്ചിരുന്നത്. അച്ഛൻ വരുമെന്നും പറഞ്ഞ് മൂത്തമ്മ എന്നെ അവരുടെ കൂടെ കൊണ്ട് പോയി…

വർഷങ്ങൾ കഴിഞ്ഞു. അന്ന് ഞാൻ എട്ടാം തരത്തിൽ പഠിക്കുകയാണ്. എന്നെ കൊണ്ടുപോകാൻ അച്ഛൻ വന്നിരിക്കുന്നുവെന്ന് പീയൂൺ വന്ന് പറഞ്ഞപ്പോൾ, മൂത്തമ്മയെന്നും ടീവിയിൽ കാണുന്ന കടമറ്റത്ത് കത്തനാറിനെയാണ് ആദ്യം ഓർമ്മ വന്നത്. പിന്നീടാണ് ഒരു വിറയലോടെ എന്റെ ഓർമ്മയിൽ ആ മുഖം തെളിഞ്ഞത്. ഏറെ രാത്രിയിൽ അമർഷം കൊണ്ട് പല്ല് കടിക്കുമ്പോൾ ഞാൻ ഓർക്കുന്ന ആ മുഖം..!

അന്ന്, ഒറ്റനോട്ടത്തിൽ തിരിച്ചറിയാൻ സാധിക്കാത്ത രീതിയിൽ അച്ഛന്റെ രൂപം മാറിയിട്ടുണ്ടായിരുന്നു. കണ്ടതും മോനേയെന്ന് വിളിച്ച് അച്ഛൻ എന്നെ മാറോട് ചേർത്ത് നിർത്തി. എതിർക്കാൻ കഴിഞ്ഞില്ല. എന്തിനെന്ന് പോലും അറിയാതെ അച്ഛനോടപ്പം എന്റെ കണ്ണുകളും നനഞ്ഞു.

ഓർത്താൽ, അമ്മയോളം അച്ഛൻ എന്നെ ദ്രോഹിച്ചിട്ടില്ലായെന്നതാണ് സത്യം… സ്നേഹിച്ചിരുന്നുവോയെന്നും അറിയില്ല. സ്നേഹിക്കുന്നവർക്ക് മാത്രമേ കൂടുതൽ ദ്രോഹിക്കാൻ പറ്റുമെന്ന് തോന്നുന്നു… അങ്ങനെയാണ് സ്നേഹത്തിന്റെ കിടപ്പെങ്കിൽ രണ്ടുപേരെയും വേണ്ട. അടുപ്പത്തിന്റെ മറ്റൊരു മുഖം മൂത്തമ്മ സമ്മാനിക്കുന്നുണ്ട്. മൂത്തമ്മയിലേക്ക് ഉള്ള് പൂഴ്ത്തി ചുരുളണമെന്നേ ചിന്തിച്ചുള്ളൂ….

ഞങ്ങൾ വീട്ടിലേക്ക് എത്തുമ്പോഴേക്കും അച്ഛന്റെ നിർദ്ദേശപ്രകാരം മൂത്തമ്മ എന്റെ സാധനങ്ങളൊക്കെ കെട്ടിപ്പൊതിഞ്ഞ് വെച്ചിട്ടുണ്ടായിരുന്നു. അച്ഛൻ എന്നെ കൊണ്ടു പോകുകയാണെത്രെ..! എങ്ങോട്ടേക്കാണെന്ന് അറിയില്ല….

മക്കൾ ഇല്ലാത്ത മൂത്തമ്മ എന്നെ മോനെപ്പോലെയാണ് കരുതുന്നത്. അല്ല… മോൻ തന്നെ…! മൂത്തമ്മയെ വിട്ട് പോകാൻ ഞാൻ ഒരുക്കമായിരുന്നില്ല. മൂത്തമ്മയ്ക്ക് എന്നേയും പിരിയാൻ പറ്റില്ല.

മൂത്തമ്മയെ വിട്ട് വരില്ലെന്ന് ഞാൻ പറഞ്ഞു. അച്ഛൻ മറുത്തൊന്നും പറഞ്ഞില്ല. മോന്റെ ഇഷ്ട്ടമെന്നും പറഞ്ഞ് അച്ഛൻ തിരിച്ച് പോകുകയും ചെയ്തു. നടന്ന് നടന്ന് ആ വളവിൽ മറയുന്നത് വരെ അച്ഛനെ ഞങ്ങൾ നോക്കി നിന്നിരുന്നു…

ആ രാത്രിയെ ഇപ്പോഴും ഓർമ്മയുണ്ട്. ഉറക്കം വരാതെ തിരിഞ്ഞും മറിഞ്ഞും കിടന്ന എന്നെ വെളുപ്പാൻ കാലം വരെ മൂത്തമ്മ തലോടിക്കൊണ്ടേയിരുന്നു.. ഇത്തിരി നേരം ഉറങ്ങിയ രണ്ടുപേരും പിറ്റേന്ന് ഉണർന്നത് ഞെട്ടിക്കുന്ന ആ വാർത്ത കേട്ടായിരുന്നു. എന്താണെന്നല്ലേ…!, അമ്മ ത,ല പൊ,ട്ടി ച,ത്ത കിണറിൽ അച്ഛൻ പൊന്തിയിട്ടുണ്ട് പോലും…!!!