ഒരിക്കൽ വല്യമ്മച്ചി കിടപ്പിലായപ്പോ കറക്കാൻ ചെന്ന വല്യപ്പച്ചനെ ട്വന്റി ക്രിക്കറ്റിൽ കോലി ബൗണ്ടറി പായിച്ചു ജയിപ്പിച്ച പോലെ ചവുട്ടി തെറിപ്പിച്ച സംഭവത്തിന് ശേഷം വല്യപ്പച്ചൻ അങ്ങനൊരു പരീക്ഷണത്തിന്……

Story written by Adam John

അമ്മാവന് ഉച്ചയൂണ് കഴിഞ്ഞാലൊരു മയക്കം പതിവാണ്. മയക്കമെന്നൊക്കെ വെറുതെ പറയുവാ. ചെവിയിൽ കൈ വെച്ചോണ്ട് കൂർക്കം വലിച്ചു കിടക്കുവാരിക്കും പലപ്പോഴും. കിടക്കുന്നത് ഇന്നിടത്താവണം എന്നൊന്നും നിർബന്ധവില്ല. ചിലപ്പോ പത്തായത്തിന് മോളിലാരിക്കും. മറ്റ്‌ ചിലപ്പോ ഇറയത്ത് നീണ്ട് നിവർന്നങ്ങനെ കിടപ്പാവും. വല്യപ്പച്ചന് ഈ രീതികളൊന്നും അത്രക്കങ്ങോട്ട് പിടിക്കത്തില്ലേലും അവൻ കുഞ്ഞല്ലായോ ഉറങ്ങിക്കോട്ടെന്നാ വല്യമ്മച്ചി പറയാ.

പശുവിനെ മേയാൻ കെട്ടിയിടത്തൂന്ന് അഴിച്ചോണ്ട് വരുന്നത് വല്യപ്പച്ചനും കറക്കുന്നത് വല്യമ്മച്ചിയും ആരുന്നു. വല്യപ്പച്ചന് കറവ ഇഷ്ടവൊക്കെ ആന്നെലും പശുവിന് വല്യപ്പച്ചനോട് അത്ര പ്രതിപത്തിയില്ലാരുന്നു. മാത്രല്ല പരിചയമില്ലാത്ത ആരേലും അകിടേൽ പിടിക്കുന്നത് അവൾക്ക് ഇഷ്ടവുമല്ല.

ഒരിക്കൽ വല്യമ്മച്ചി കിടപ്പിലായപ്പോ കറക്കാൻ ചെന്ന വല്യപ്പച്ചനെ ട്വന്റി ക്രിക്കറ്റിൽ കോലി ബൗണ്ടറി പായിച്ചു ജയിപ്പിച്ച പോലെ ചവുട്ടി തെറിപ്പിച്ച സംഭവത്തിന് ശേഷം വല്യപ്പച്ചൻ അങ്ങനൊരു പരീക്ഷണത്തിന് മുതിർന്നതുമില്ല. അടുത്ത തവണ ചിലപ്പോ സിക്സറിന് പറത്തിയാലോ എന്ന് കരുതീട്ടാവും.

ഒരു ദിവസം പതിവ് പോലെ പശുവിനെ കറക്കാൻ വേണ്ടി കെട്ടിയിട്ട ശേഷം തിരികെ വന്ന വല്യപ്പച്ചൻ കാണുന്നത് പത്തായത്തിന്മേൽ കിടന്നോണ്ട് കൂർക്കം വലിക്കുന്ന അമ്മാവനെയാ.ആര് കണ്ടാലും അസൂയ തോന്നിപ്പോവുന്ന കിടപ്പല്ലായോ. വല്യപ്പച്ചനത് സഹിച്ചീല. വല്യപ്പച്ചൻ അപ്പോ തന്നെ വല്യമ്മച്ചി അടുത്തെങ്ങും ഇല്ലെന്ന് ഉറപ്പ് വരുത്തി അമ്മാവൻ കിടന്നിരുന്ന പായ ഒരൊറ്റ വലിയാരുന്നു. എന്നിട്ടൊന്നും അറിയാത്ത പോലെ പുറത്തോട്ടിറങ്ങി ചാരു കസേരയിൽ ചെന്നിരുന്നു. പായയോടൊപ്പം താഴെ വീണ അമ്മാവൻ സംഭവിച്ചതെന്തെന്ന് മനസിലാവാതെ കണ്ണ് മിഴിച്ചോണ്ട് ചുറ്റിനും നോക്കി ചിലപ്പോ വല്ല സ്വപ്നോം കണ്ടതാരിക്കും എന്നോർത്താണോ എന്തോ വീണിടത്ത് തന്നെ കിടന്ന് ഉറക്കം തുടർന്നു.

കറവയും കഴിഞ് മിച്ചം വരുന്ന പാല് പശുക്കിടാവിന് കുടിക്കാനും വേണ്ടി അതിനെ അഴിച്ചു വിട്ടോണ്ട് പാല് നിറച്ച മൊന്തയുമായി പുരാണത്തിലേ ശകുന്തളയെപ്പോലെ അകത്തോട്ട് വരുവാരുന്ന വല്യമ്മച്ചി തറയിൽ കിടക്കുവാരുന്ന അമ്മാവനെ ശ്രദ്ധിച്ചീലാരുന്നു. ശ്രദ്ധിക്കേണ്ട കാര്യമില്ലാരുന്നു താനും. കാരണം വല്യമ്മച്ചി പുറത്തോട്ടിറങ്ങുമ്പോ അമ്മാവൻ പത്തായത്തിന്റെ മോളിലല്ലായോ. മന്ദം മന്ദം നടന്ന ശകുന്തള സോറി വല്യമ്മച്ചി കാലിൽ ദർഭ മുന തട്ടിയ കൂട്ട് അമ്മാവന്റെ ദേഹത്തോട്ട് തട്ടി മറിഞ്ഞു വീണതും സിനിമാ നടന്മാരുടെ കട്ടൗട്ടിൽ പാലഭിഷേകം നടത്തിയ പോലെ പാല് മുഴുവനും അമ്മാവന്റെ മോളിലോട്ട് വീണ് പരന്നോഴുകി.

ചുണ്ടേലോട്ട് വീണ പാല് വായിലോട്ട് എത്തിയപ്പോഴാണ് അമ്മാവൻ അത് നക്കിത്തുടച്ചോണ്ട് ഉറക്കമുണർന്നെ. ശബ്ദം കേട്ടോടി വന്ന വല്യപ്പച്ചൻ കാണുന്നത് പാൽ പാത്രവുമായി എഴുനേൽക്കാൻ ശ്രമിക്കുന്ന വല്യമ്മച്ചിയെയാണ്.

അമ്മാവന്റെ ചുണ്ടിലെ പാൽപ്പത കൂടി കണ്ടപ്പോ വല്യപ്പച്ചൻ കരുതിയത് വല്യമ്മച്ചി അമ്മാവനോടുള്ള സ്നേഹം മൂത്ത് പാല് കുടിപ്പിക്കുവാണെന്നാ. ഇത്രക്ക് കഷ്ടപ്പെടാതെ അവനെ ആ പശൂന്റെ അകിടിനടുത്തോട്ട് കൊണ്ട് ചെന്നിരുത്തിക്കൂടായോ എന്നും ചോദിച്ചോണ്ട് വല്യപ്പച്ചൻ പുറത്തോട്ടിറങ്ങി. ചായക്കടയിലോട്ട് പോണതാ. കാരണം ഇനിയവിടെ നിന്നാലും പാൽ ചായ കിട്ടത്തില്ലെന്ന് വല്യപ്പച്ചന് അറിയാരുന്നു.

അന്നത്തെ സംഭവത്തിന് ശേഷം അമ്മാവൻ കിടപ്പ് കോണിപ്പടിയുടെ അടിയിലോട്ട് മാറ്റിയാരുന്നു. അവിടാവുമ്പൊ ആർക്കും ബുദ്ധിമുട്ടില്ലാലോ. മാത്രവല്ല വെളിച്ചക്കുറവുള്ളത് കൊണ്ട് സുഖവായി ഉറങ്ങുവേം ചെയ്യാം.

ഒരു ദിവസം ഉച്ചയൂണൊക്കെ കഴിഞ് പതിവ് മയക്കത്തിലാരുന്നു അമ്മാവൻ.വല്യമ്മച്ചി കറവ കഴിഞ് വേലിക്കരികിൽ ആരോടോ സംസാരിച്ചോണ്ട് നിക്കുവാ. വല്യപ്പച്ചൻ ചാരു കസേരയിൽ ഇരുന്നോണ്ട് പശു അയവിറക്കുന്ന കൂട്ട് പഴയ ഓർമകൾ അയവിറക്കുവാരുന്നു.

തൊടിയിൽ ചിക്കി ചികഞ്ഞു നടന്നോണ്ടിരുന്ന പിടപ്പെണ്ണിനെ ആകർഷിക്കാൻ വേണ്ടിയാവണം എവിടുന്നോ സങ്കടിപ്പിച്ചൊരു മണ്ണിര യുമായി കൊക്കി ഒലിപ്പിക്കുവാരുന്നു പൂവാലൻ. ഇടക്ക് വേഗം വാടി ഇപ്പ തീരുമെന്ന് പറയുന്ന കൂട്ട് നീട്ടിയൊന്നു കൂവേം ചെയ്തു. കൂവൽ കേട്ടാവണം നേരം വെളുത്തെന്ന് കരുതി കണ്ണ് തിരുമ്മിക്കൊണ്ട് എഴുന്നേറ്റ അമ്മാവൻ പതിവ് പോലെ നേരെ അടുക്കളയിലോട്ട് ചെന്നപ്പോ കണ്ട കാഴ്ച പാത്രങ്ങളൊക്കെ കഴുകി വെച്ചേക്കുവാ. കഴിക്കാൻ ഒന്നുവില്ല.

എത്ര തന്നെ തിരക്കുണ്ടേലും അമ്മാവന് വേണ്ടി പ്രാതൽ ഉണ്ടാക്കാൻ വല്യമ്മച്ചി ഒരിക്കലും മടി കാണിക്കത്തില്ലാരുന്നു. അതോണ്ട് തന്നെ ഭക്ഷണം ഇല്ലാതെ കണ്ടപ്പോ അമ്മാവന് വല്ലാതെ സങ്കടം വന്നു. ഇങ്ങനെ അവഗണന സഹിച്ചോണ്ട് ജീവിക്കുന്നതിലും ഭേദം മരിക്കുന്നതാ എന്നോർത്താണോ എന്തോ അപ്പോ തന്നെ പുറത്തോട്ടിറങ്ങി ചായ്‌പ്പിലുണ്ടാരുന്ന കയറും എടുത്തോണ്ട് പ്ലാവ് ലക്ഷ്യമാക്കി നടക്കുവാരുന്നു അമ്മാവൻ.

എന്തോ കാര്യത്തിന് തിരിഞ്ഞു നോക്കിയ വല്യമ്മച്ചി കാണുന്നത് പ്ലാവേലോട്ട് വലിഞ്ഞു കേറുന്ന അമ്മാവനെയാ. ചക്കയില്ലാത്ത പ്ലാവേൽ ഈ ചെറുക്കനെന്നാ കാര്യവാന്നോർത്ത് ഓടിച്ചെന്ന വല്യമ്മച്ചി അമ്മാവന്റെ കയ്യിലുള്ള കയർ കണ്ടതോടെ നെഞ്ചത്തടിച്ചു നിലവിളിക്കാൻ തുടങ്ങി. ശബ്ദം കേട്ടോടി വന്ന വല്യപ്പച്ചൻ ഒരു കണക്കിന് അമ്മാവനെ താഴെ ഇറക്കാൻ ശ്രമിക്കുന്ന കണ്ടപ്പോ വല്യമ്മച്ചിക്ക് എന്നാ സന്തോഷവായെന്നോ. വല്യപ്പാച്ചന് അമ്മാവനോട് ഇഷ്ടവൊക്കെ ഉണ്ടെന്നോർത്താവും സന്തോഷം വന്നേ.

ഒടുക്കം എങ്ങിനൊക്കെയോ താഴെ ഇറങ്ങിയ അമ്മാവന്റെ കയ്യിലോട്ട് കനത്തിലൊരു കയർ കൊടുത്തോണ്ട് വല്യപ്പച്ചൻ പറയുവാ ഇനി കേറിക്കോ. നേരത്തെ കൊണ്ടോയ കയറിന് വല്യ ബലം പോരായിരുന്നെന്ന്.