ഇവൾടെ അപ്പന് വായുഗുളിക വാങ്ങാൻ പോവുകയാണോ ക൪ത്താവേ എന്ന് വഴിവക്കിൽ ആരോ പറഞ്ഞത് നിമ പോട്ടേന്ന് വെച്ചു……..

ഓഫീസ് ടൈം

എഴുത്ത്:- ഭാഗ്യലക്ഷ്മി. കെ. സി.

മമ്മീ… എനിക്ക് ഓഫീസിൽ പോകാനുള്ള ടൈമായി. ഒന്നുവേഗം…

നിമ വിളിച്ചുപറഞ്ഞുകൊണ്ട് തിരക്കിട്ട് കോഫി എടുത്ത് കുടിച്ചു. ഇന്ന് ജോയ്ൻ ചെയ്യുന്ന ദിവസമാ… ട്രാൻസ്ഫർ ആയിട്ട് എല്ലാം വാരിപ്പെറുക്കി ഓടിവന്നതാ പ്രശ്നമായത്. ഒന്നും വെച്ചസ്ഥലത്ത് കാണുന്നില്ല. നോക്കിയെടുക്കാൻ നിന്നാൽ നടക്കില്ല.. സമയം ലേറ്റാകാനിടയുണ്ട്. നല്ല തൂവെള്ള ഷ൪ട്ടും ബ്ലാക്ക് മിഡിയും. ഒരു ടൈ കൂടി ചേ൪ന്നപ്പോൾ അടിപൊളി. മുടി പോണിടെയിൽ കെട്ടി ചുണ്ടിൽ ലിപ്സ്റ്റിക്കുമിട്ട് ഒരുങ്ങിയ നിമ കണ്ണാടിയിൽ ഒന്നുകൂടി നോക്കി.

നിമ മമ്മി കൊടുത്ത ലഞ്ച് ബോക്സ് വാങ്ങി ബാഗിലിട്ട് സ്കൂട്ടിയിൽ കത്തിച്ചു വിട്ടു.

ഇവൾടെ അപ്പന് വായുഗുളിക വാങ്ങാൻ പോവുകയാണോ ക൪ത്താവേ എന്ന് വഴിവക്കിൽ ആരോ പറഞ്ഞത് നിമ പോട്ടേന്ന് വെച്ചു. സാധാരണഗതിയിൽ ആ പറഞ്ഞവളുടെ അണപ്പല്ലിന്റെ എണ്ണം കുറക്കാതെ നി൪ത്തിയ സ്കൂട്ടിയിൽ രണ്ടാമത് കേറാത്ത നിമ താനിങ്ങനെ നന്നാവാൻ തുടങ്ങിയതെപ്പഴാ എന്ന് ചിന്തിച്ചു.

നാട്ടിലേക്കാണ് ട്രാൻസ്ഫർ എന്നറിഞ്ഞതുമുതൽ വേണോ എന്നൊരാലോചന വന്നതാ.. ഇതുവരെ എൻജോയ് ചെയ്ത ഫ്രീഡമൊക്കെ അങ്ങ് പോകും. മമ്മിയുടെ ചെവിക്ക് പിടിക്കലും ശാസനയും വേറെ. മറ്റ് ആകെയുള്ള സമാധാനം അപ്പാപ്പനാണ്. ഇടയ്ക്ക് രണ്ട് തുള്ളി വൈ ൻ കട്ടെടുക്കാൻ ആ അലമാരയുടെ ചുറ്റുവട്ടത്ത് ചുറ്റിപ്പറ്റി നിൽക്കുമ്പോഴേ അപ്പാപ്പൻ തന്റെ പദ്ധതി മണത്തിട്ടുണ്ടാകും.

നീയതിൽ രണ്ടുതുള്ളി എനിക്കു കൂടി ബാക്കിവെക്കണേടീ എന്ന് ചിരിച്ചുകൊണ്ട് പറയും. പക്ഷേ പേഴ്സിലോ മറ്റോ നോക്കിയാൽ മറ്റുള്ള വലിപ്പുകളുടെ താക്കോലെവിടെ അപ്പാപ്പാ എന്ന് ചോദിച്ചാൽ ചാടിക്കടിക്കാൻ വരും. അതൊന്നും നീ നോക്കണ്ട എന്നൊരു കട്ടായം പറഞ്ഞ് ഓടിച്ചുകളയും. അപ്പാപ്പന് പണ്ടെന്നോ വന്ന ലൌലെറ്റേർസ് വല്ലതും അതിൽ തീർച്ചയായും കാണും. ഒരുദിവസം കൈയോടെ പിടിച്ച് വെളിച്ചത്തു കൊണ്ടുവന്ന് പല്ല് പോയ മോണകാട്ടിയുള്ള നാണം കല൪ന്ന ചിരിയടക്കം ക്യാമറയിലാക്കി അപ്പാപ്പന്റെ പ്രണയലേഖനങ്ങൾ എന്ന് സ്റ്റാറ്റസ് കാച്ചണം.

നിമക്ക് അപ്പാപ്പന്റെ ഓരോ കുസൃതിയോ൪ത്ത് ചിരിവന്നു. റോഡിൽ നല്ല തിരക്ക്. ഈ ട്രാഫിക് ജാമൊക്കെ വല്ല ബ്രഡ്ഡിലും തേച്ച്തന്നാൽ താനിപ്പോൾ രണ്ട് നിമിഷം കൊണ്ട് അകത്താക്കിയേനേ…

ഒരിത്തിരി ഗാപ് കിട്ടിയപ്പോൾ നിമ തന്റെ സ്കൂട്ടി വെട്ടിച്ച് ഓരോ കാറിന്റെയും ബസ്സിന്റെയും ഇടയിലൂടെ പിന്നെയും പറത്തിവിട്ടു.

ഹാവൂ, ഭാഗ്യം, കൃത്യസമയം. നേരത്തെ എത്തിയില്ലെങ്കിലും ലേറ്റായില്ല. സ്കൂട്ടി ഒതുക്കി, ഡ്രസ്സ് ശരിയാക്കി വേഗം കയറിച്ചെന്നു. സെക്യൂരിറ്റി സ്റ്റാഫ് തന്റെ പേരും മറ്റും എഴുതിവെച്ച് അകത്തേക്ക് കയറ്റിവിട്ടു. നല്ല തിരക്കുള്ള ഓഫീസാണ്. കുറേയേറെപ്പേ൪ കയറിവരുന്നുണ്ട്. പലരുടെയും കൈയിൽ കോഫിയും ഫയലും ബാഗും, അന്തരീക്ഷം നിറയേ ഗുഡ്മോർണിങ്ങും ഹായും പുഞ്ചിരിയും. നിമ, ഓ ഇതൊക്കെ എത്ര കണ്ടിരിക്കുന്നു എന്ന ഭാവത്തിൽ ലിഫ്റ്റിനടുത്തേക്ക് ധൃതിയിൽ നടന്നു.

പെട്ടെന്നാണ് കൈയിൽ കോഫിയുമായി വന്ന ഒരാളുമായി നിമ കൂട്ടിയിടിച്ചത്. തന്റെ വൈറ്റ് ഷേ൪ട്ട് നിമിഷനേരം കൊണ്ട് പകുതി സാൻഡൽകളറുപോലായതു കണ്ട് നിമയുടെ കൺട്രോൾ പോയി. അവൾ പരിസരം മറന്ന് ഷൌട്ട് ചെയ്തു. കൂട്ടത്തിൽ രണ്ട് തെ റിയും തെറിച്ചുവീണോന്ന് ഒരു സംശയം. വേണമെന്ന് വെച്ചല്ല, തന്റെ ആദ്യത്തെ ദിവസം കളഞ്ഞല്ലോ എന്ന ഖേദത്തിൽ അറിയാതെ നാവ് പറ്റിച്ചതാണ്.

അയാൾ പെട്ടെന്ന് തന്നെ അയാളുടെ വൈറ്റ്ഷേ൪ട്ട് ഊരിക്കൊടുത്തു. നിമ അതുവാങ്ങി അയാളോട് പുറം തിരിഞ്ഞ് നിൽക്കാൻ പറഞ്ഞ്, സിസിടിവി ഇല്ലാത്ത ഏരിയനോക്കി പെട്ടെന്ന് തന്നെ ഡ്രസ്സ് ചേഞ്ച് ചെയ്തു. ഓടി ലിഫ്റ്റിൽ കയറി ബോസിന്റെ മുന്നിലെത്തി. ഫയൽ തുറന്ന് പേപ്പറെല്ലാം എടുത്ത് കൊടുത്തു. ജോയ്ൻ ചെയ്തു.

ബോസ്, മിസ്റ്റർ ടോം സിറിൽ, ടീം ലീഡറെ വിളിച്ചു.

ഇത് പുതുതായി ജോയ്ൻ ചെയ്ത മിസ് നിമ. ഇനി നിങ്ങളുടെ ടീമിൽ ഇവർ കൂടി കാണും. കാര്യങ്ങളൊക്കെ പറഞ്ഞു കൊടുക്കുക. ഷേയ്ക് ഹാന്റ് കൊടുക്കാൻ നിമ കൈ നീട്ടി, നിമ ഒന്നേ നോക്കിയുള്ളൂ, സാൻഡൽ കള൪ മുഴുവൻ പടർന്നിട്ടില്ലാത്ത ഷ൪ട്ടുമിട്ട് അയാൾ..

ബോസ് പറഞ്ഞു:

ഇതിവിടെ പതിവാ. കോഫി കൈയിൽ പിടിച്ചുകൊണ്ട് ആരെങ്കിലുമായി കൂട്ടിയിടിക്കും, ഷ൪ട്ടൂരി കൊടുക്കേണ്ടിവരും. അയാൾക്ക് കിട്ടുന്ന സാലറി മുഴുവൻ വൈറ്റ് ഷേ൪ട്ട് വാങ്ങാൻ തികയുന്നില്ല എന്നാ വൈഫ് പറയുന്നത്. ഇന്നാ൪ക്കാണോ ആവോ ആ ഷ൪ട്ട് കിട്ടിയത്…

ഒരേ സമയം എല്ലാവരും ചിരിച്ചു. പക്ഷേ അവന്റെ മുഖത്ത് ഒരു അവിഞ്ഞ ചിരിയും, നിമയുടെ മുഖത്ത് ഇന്നത്തെ ഇര ഞാനാ സ൪ എന്ന് പറയണോ എന്നറിഞ്ഞുകൂടാത്ത ചിരിയുമായിരുന്നു.