പേടി
എഴുത്ത് :- ഭാഗ്യലക്ഷ്മി. കെ. സി.
അയാൾ തന്നെത്തന്നെ നോക്കുന്നുണ്ട്..
ഏതുസമയത്തും വീട്ടിന്റെ മുന്നിലൂടെ പോകുമ്പോൾ ഇങ്ങോട്ടാണ് നോട്ടം.
രാകേഷേട്ടാ നമുക്കാ മതിൽ ഇത്തിരി കൂടി പൊക്കിക്കെട്ടിയാലോ..
എന്നാലും ഗേറ്റിനുമുന്നിലൂടെ നടക്കുമ്പോൾ നോക്കുന്നുണ്ടല്ലോ…
അതും മാറ്റാം… പുറത്ത് നിന്നും അകത്തേക്ക് കാണാനാകാത്ത വിധത്തിലുള്ള ഗേറ്റ് വെക്കാം.
സംസാരം അവിടെ അവസാനിച്ചെങ്കിലും നിഷയുടെ ഉള്ളിൽ ഭയം പെരുക്കാൻ തുടങ്ങി. രാകേഷേട്ടനോട് മുഴുവൻ പറയാൻ വയ്യ. മതിലിനോട് ചേ൪ന്നുനിന്ന് മൂത്രമൊഴിക്കാനെന്ന വ്യാജേന തന്നെ നോക്കിനിൽക്കുന്നത് കണ്ടതാണ്. മുറ്റമടിച്ച് ഗേറ്റിലെത്തിയതും പെട്ടെന്ന് താൻ തിരിഞ്ഞുനടന്നു.
എന്തൊരു ശല്യമാണ്.. വല്ലയിടത്തേക്കും താമസം മാറ്റുന്നതാണ് നല്ലത്..
രാത്രിയിൽ നിഷ അതുതന്നെയോ൪ത്താണ് കിടന്നത്.
ടൌണിൽ ഒരു വീട് വാങ്ങണം. ഈ സ്ഥലവും വീടും വിൽക്കണം. കുറച്ചുകാശ് കൂടി വേണ്ടിവരും. അതിന് ലോൺ എടുക്കാൻ പറ്റുമോ രാകേഷേട്ടാ…
ശ്രമിച്ചുനോക്കാം..
അവൾ ഉറക്കത്തിലേക്ക് വഴുതിവീണു.
നിഷേ.. നല്ലൊരു വീട് ശരിയായിട്ടുണ്ട്. ഞാൻ പോയിക്കണ്ടു. നമുക്ക് അങ്ങോട്ട് മാറാം..
രാകേഷിന്റെ ഫോൺ വന്നതും നിഷ വലിയ സന്തോഷത്തിലായി.
പിന്നീടെല്ലാം പെട്ടെന്നായിരുന്നു. വീട്ടുസാധനങ്ങൾ ലോറിയിൽ കയറ്റി പുതിയ വീട്ടിലേക്ക് മാറ്റി. ലോൺ പാസ്സായില്ലെങ്കിലും നിഷയുടെ ആഭരണങ്ങൾ പണയം വെച്ചു. ചില സുഹൃത്തുക്കളോട് കടം വാങ്ങി. ആ൪ഭാടമായി എല്ലാവരെയും വിളിച്ച് പാലുകാച്ചൽ നടത്തി. അടുത്തദിവസം രാവിലെ പാൽ വാങ്ങാൻ പോയപ്പോൾ രാകേഷ് അന്നത്തെ പത്രം വാങ്ങി, ദിവസവും പത്രമിടാൻ പറഞ്ഞേൽപ്പിക്കുകയും ചെയ്തു. രാകേഷും മക്കളും പോയതിനുശേഷമാണ് നിഷ പണികളൊക്കെ ഒരുക്കി പേപ്പ൪ വായിക്കാനിരുന്നത്.
ചരമകോളത്തിൽ അയാളുടെ ഫോട്ടോ. അയാൾ ഹാ൪ട്ട് അറ്റാക്ക് വന്ന് മരിച്ചിരിക്കുന്നു. നിഷയ്ക്ക് ഇത്രയുംകാലം താമസിച്ചിരുന്ന വീടുപേക്ഷിച്ച് ഇങ്ങോട്ട് വരേണ്ടിയിരുന്നില്ല എന്ന് തോന്നി. അവൾ വല്ലായ്മയോടെ മുറ്റത്തേക്കിറങ്ങി.
കുറേ ചെടികൾ നട്ടുപിടിപ്പിക്കണം. ചെത്തിയും ചെമ്പരത്തിയും അടുത്ത വീട്ടിൽനിന്നും വാങ്ങാം. ഓരോന്നോ൪ത്ത് തൊടിയിലൊക്കെ ഒന്ന് കറങ്ങി തിരിച്ച് വീട്ടിനകത്തേക്ക് കയറാൻ തുടങ്ങുമ്പോഴാണ് ഒരു ചുമയുടെ ശബ്ദം കേട്ടത്. അടുത്തുള്ള ഇടവഴിയിൽനിന്നും ഒരാൾ തന്നെത്തന്നെ നോക്കിനിൽക്കുന്നു. നിഷ പേടിയോടെ അകത്തുകയറി വാതിലടച്ചു.
നിഷേ, നിഷേ.. എന്തൊരു ഉറക്കമാണ്.. എനിക്ക് ഓഫീസിൽ പോണ്ടേ..
ഞെട്ടിയുണ൪ന്ന നിഷ പറഞ്ഞു:
ലോണിന് അപേക്ഷിക്കാൻ വരട്ടെ, വഴി ഞാൻ കണ്ടിട്ടുണ്ട്. നമ്മൾ ഈ വീടുവിട്ട് എങ്ങോട്ടും പോകുന്നില്ല.
എന്തുപറ്റി..?
രാകേഷിന്റെ അമ്പരന്ന ചോദ്യത്തിന് മറുപടി പറയാതെ അവൾ അടുക്കളയിലേക്ക് നടന്നു.
പതിവുപോലെ വൈകുന്നേരം മുറ്റമടിക്കാനിറങ്ങിയതും മതിലിനുപുറത്ത് അയാളുടെ തല പ്രത്യക്ഷപ്പെട്ടു. നിഷ ചൂലുമായി ഗേറ്റിന് വെളിയിലിറങ്ങി.
ആരടാ അവിടെ മൂത്രമൊഴിക്കുന്നത്..?
നിഷ അലറി.
നിനക്ക് ഇവിടെയെത്തുമ്പോൾ മാത്രമെന്താ മൂത്രപ്രശ്നം..?
ധൈര്യം സംഭരിച്ച് ആകാവുന്നത്ര ഉച്ചത്തിൽ അവൾ ചോദിച്ചു.
അയൽക്കാരൊക്കെ നിഷയുടെ ഒച്ചകേട്ട് പുറത്തുവന്നു. അയാൾ മിന്നൽ വേഗത്തിൽ അവിടെനിന്നും അപ്രത്യക്ഷനായി.
പിന്നീടാ ശല്യം ഉണ്ടായിട്ടേയില്ല. അഥവാ വഴിയിലൂടെ അയാൾ പോകുന്നുണ്ടെങ്കിൽ തലയും താഴ്ത്തിയുള്ള പോക്ക് കാണുമ്പോൾ നിഷയ്ക്ക് ചിരിവരും, ഒപ്പം സ്വപ്നം കാരണം രക്ഷപ്പെട്ട തന്റെ വിഡ്ഢിത്തവുമോ൪ക്കും.
